Azərbaycan, Bakı, 03 aprel / Trend ", müxbir Q.Cəbiyev/ Azərbaycanın müxalif Demokrat Partiyası (ADP) hesab edir ki, iqtidarla müxalifət arasında Dağlıq Qarabağ məsələsində yaxınlaşma var. "Hesab edirik ki, Qarabağ məsələsi ilə bağlı dialoq aparılmalı və ümumi prinsiplər razılaşdırılmalıdır" belə bir təklifi cümə axşamı Trend "a açıqlamasında sağtəmayüllü ADP sədri, partiyanın prezidentliyə namizədi Sərdar Cəlaloğlu səsləndirib.
Ötən ay BMT-də "Azərbaycanın işğal olunmuş ərazilərindəki vəziyyətlə bağlı" qətnamə layihəsi qəbul edilib. ATƏT-in Minsk qrupunun həmsədr ölkələrinin sənədin əleyhinə səs verməsi həm iqtidar, həm də müxalifət tərəfindən kəskin şəkildə pislənilib.
Cəlaloğlu hesab edir ki, bu yaxınlaşma dialoqun başlanılmasına qədər inkişaf etdirilməlidir. "Bundan başqa, Avropa Şurası tərəfindən Azərbaycana ölkə daxili məsələlərlə bağlı müəyyən təzyiqlərin olunacağı gözlənilir. ADP hesab edir ki, bununla bağlı da daxildə müəyyən razılaşmalar əldə edilməlidir" Cəlaloğlu əlavə edib.
Hakim Yeni Azərbaycan Partiyası (YAP) icra katibinin müavini, millət vəkili Mübariz Qurbanlı isə Trend "a bildirib ki, Azərbaycanda Qarabağ məsələsi ilə bağlı iqtidarla müxalifət arasında ciddi fikir ayrılıqları yoxdur. "Bununla belə, biz dialoqa həmişə hazırıq. YAP özü dəfələrlə dialoqun təşəbbüskarı olub. Biz belə təşəbbüsləri də dəyərləndirməyə hazırıq" - deyə o bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20%-i, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələki nəticəsiz sülh danışıqları aparılır.
Məqalə müəllifi ilə əlaqə ünvanı: [email protected]