Azərbaycan, Bakı, 21 aprel / Trend , müxbir C.Babayeva/ Gürcüstan azərbaycanlılarının "Qeyrət" Xalq Hərəkatı parlament seçkilərində Gürcüstanın hakim - "Vahid Milli Hərəkat" partiyasının siyahısında namizədlərini irəli sürməkdən imtina edib. Bu barədə Trend -a bazar ertəsi Tbilisidən telefonla Hərəkatın sədri Əlibala Əsgərov məlumat verib
Gürcüstanda parlament seçkiləri mayın 21-də keçiriləcək. Parlament seçkilərində Gürcüstanın 62 siyasi partiyası iştirak edəcək. Gürcüstanın yeni seçiləcək parlamenti 150 deputatdan (hazırkı parlament 235 deputatdan ibarətdir) ibarət olacaq. Bunlardan 75-i proporsional, 75-i majoritar sistem üzrə seçiləcək.
Aprelin əvvəlindən "Qeyrət" Xalq Hərəkatı iki azərbaycanlının namizədliyinin irəli sürülməsi ilə bağlı Gürcüstanın hakim partiyası ilə danışıqlar aparırdı.
Gürcüstan parlamentinin sədri, hakim "Vahid Milli Hərəkat" partiyasının seçki siyahısında birinci olan Nino Burcanadzenin Trend -a bildirdiyinə görə, Gürcüstanın hakim partiyası seçki siyahılarında Gürcüstan azərbaycanlılarını təqdim etməyə hazırdır.
Əsgərovun sözlərinə görə, seçkilərə qatılmaqdan imtina olunmasının səbəbi Hərəkatın namizədlərinə hakim partiyanın siyahısında sonuncu yerlərin təklif olunmasıdır.
""Qeyrət" Xalq Hərəkatı proporsional siyahıda sonuncu yerlərdə namizədlərini irəli sürsəydi, onların seçilməsi üçün heç bir şans olmazdı", deyə Əsgərov bildirib.
Gürcüstanda, əsasən Kvemo-Kartli regionunda təxminən 500 min azərbaycanlı yaşayır.
Gürcüstanın hakim partiyası Marneuli rayonundan majoritar siyahıda azərbaycanlı Azər Süleymanovun namizədliyini təqdim edib.
Məqalə müəllifi ilə əlaqə saxlamaq üçün ünvan - trend