Azərbaycan, Bakı, 02 may / Trend , müxbir S.İlhamqızı/ Azərbaycan Liberal Partiyasının lideri Lalə Şövkət hesab edir ki, beynəlxalq qurumlar Azərbaycanda keçiriləcək prezident seçkisinin demokratik keçirilməsi, əlverişli seçki mühiti yaradılması üçün hakimiyyətə təzyiq göstərməlidirlər.
"Əgər beynəlxalq təzyiqlər olarsa, seçki nisbətən demokratik şəraitdə baş tuta bilər" - deyə Lalə Şövkət Trend a müsahibəsində bildirib.
ATƏT, Avropa Şurası və Avropa Komissiyasının Azərbaycandakı nümayəndələri oktyabrda Azərbaycanda keçiriləcək prezident seçkisi ilə bağlı dəstək proqramını açıqlayıblar. Dəstək proqramında göstərilib ki, seçki prosesinə cəlb olunmuş icra strukturları və iştirakçılarının bacarıq və müstəqilliyini gücləndirmək, bütün namizədlərin seçki kampaniyalarının müstəqil, qərəzsiz yayımını təmin edən media mühitinə öz töhfəsini vermək, toplaşma azadlığı hüququnun müvafiq tətbiqinə dəstək vermək, eləcə də ictimaiyyətin seçki prosesinə marağını artırmaq vacibdir.
Müxalifət partiyasının lideri Lalə Şövkət hesab edir ki, sadəcə bəyanatlar verməklə seçkidə demokratiklik təmin olunmur: "Biz belə çağırışları, bəyanatları çox eşitmişik. Özümüzün əvvəlki təcrübəmizə əsaslanaraq deyə bilərəm ki, bu çağırışların, tövsiyələrin heç bir əməli nəticəsi olmayıb" - deyə xanım Şövkət bildirib.
Onun sözlərinə görə, ALP-nin təmsil olunduğu "Azadlıq" bloku dəfələrlə Avropa Şurasına, ATƏT-ə müraciət edərək, Azərbaycanın götürdüyü öhdəlikləri yerinə yetirməsi üçün tədbirlər görülməsini tələb edib. Lalə Şövkət hesab edir ki, beynəlxalq təşkilatların ölkələrə demokratiya ilə bağlı təzyiq göstərmək meyxanizmləri var və onlar bundan istifadə etməlidirlər.
"ABŞ Dövlət Katibi Kondoliza Rays ötən il Vilnüsdə verdiyi bəyanatında bildirmişdi ki, beynəlxalq birlik ölkələrdə seçkilərin azad, demokratik keçirilməsinin vacib olduğunu deyirsə, həm də bunu təmin etməlidir. ABŞ Dövlət Departamentinin 2006, 2007-ci illər üzrə hesabatlarında da bildirib ki, Azərbaycanda vətəndaşlar dinc yolla hakimiyyəti dəyişmək hüququndan məhrumdur. Biz də bu fikirdəyik ki, Azərbaycanda elan olunmamış fövqəladə vəziyyətdir, müxalifətin mitinqlər keçirmək, televiziyalara çıxmaq imkanı yoxdur" - deyə Lalə Şövkət bildirib.
ABŞ-ın Azərbaycandakı səfiri Enn Dersi də müxalifətin prezident seçkisində iştirakını arzuladığını deyib və hamını seçkidə iştiraka çağırıb.
Lalə Şövkət bildirib ki, səfirin bu çağırışı başadüşüləndir. Lakin "Azadlıq" bloku, sərbəst toplaşmaq hüququ, söz azadlığı təmin edilməsə, seçkidə iştirak etmək niyyətində deyil: "Biz o fikirdəyik ki, hakimiyyət siyasi iradə nümayiş etdirsə, indiki seçki qanunu ilə də demokratik seçki keçirmək mümkündür. Əks halda, biz seçki şousunda iştirak etməyəcəyik" - deyə müxalifət lideri bildirib.
Sabiq dövlət katibi Lalə Şövkət 1996 -cı ildə Azərbaycan Liberal Partiyasını yaradıb. O, 2003-
cü ildə keçirilmiş prezident seçkisində namizəd olub və topladığı səslərə görə 8 nəfər namizəd arasında 3-cü yeri tutub. 2005-ci ilin parlament seçkisində millət vəkili seçilib, lakin öz istəyi ilə deputat mandatından imtina edib. Hazırda müxalifəti təmsil edən "Azadlıq" siyasi blokunun həmtəsisçisi və həmsədridir.
Müəlliflə əlaqə saxlamaq üçün elektron ünvan - [email protected]