Azərbaycan, Bakı, 11 iyun/ Trend , müxbir A.Bədəlova/ ABŞ Enerji İnformasiyası Dövlət İdarəsinin (EİA) proqnozlarına əsasən, 2008-ci ildə OPEK-in neft tədarükü 1,69 mln. barel - 2007-ci ildə 35,41 mln. barelə qarşı 37,1 mln. barelədək artacaq.
EİA 2009-cu ildə OPEK-in neft tədarükünün cüzi - sutkada 37,08 mln. barelədək azalacağını proqnozlaşdırır.
EİA-dan çərşənbə günü Trend -a bildiriblər ki, OPEK-in neft tədarükü 2008-ci ilin ikinci rübündə sutkada 140 min barel artacaq və orta hesabla sutkada 36,9 mln. barel təşkil edəcək. Dünyanın ən iri neft dövlətində - Səudiyyə Ərəbistanında iyunda neft hasilatı sutkada 9,4 mln. barelə çatacaq.
"Üçüncü rüb ərzində OPEK-in tədrükləri xammal tədarükü ilə fasilələrin müşahidə olunduğu İraq və Nigeriyada vəziyyətin gələcək inkişafından asılı olacaq", - EİA-dan bildiriblər. Fasilələr fors-major vəziyyətlər və siyasi gərginlik də daxil olmaqla müxtəlif səbəblərdən yaranıb.
EİA OPEK-ə daxil olmayan ölkələrin neft tədarüklərinin həcminin artmasına dair proqnozlarını azaldıb. EİA-nın rəsmi saytında nəşr olunmuş yeni iyun proqnozlarına görə, 2008-ci ildə tədarük sutkada 310 min barel olmaqla 49,46 mln. barelədək artacaq.
Proqnozlara əsasən, 2008-ci ildə Azərbaycanın neft tədarükləri sutkada 0,96 mln. barel təşkil edəcək. Ölkə 2009-cu ildə tədarükü 0,24 mln. barel olmaqla sutkada 1,2 mln. barelədək artıracaq. 2009-cu ildə Qazaxıstanın neft tədarükünün həcmi 2008-ci ildə sutkada 1,49 mln. barelə qarşı 1,63 mln. barel təşkil edəcək. Türkmənistan 2009-cu ildə tədarükü cüzi - 2008-ci ildə sutkada 0,19 mln. barelə qarşı 0,2 mln. barelədək atıracaq.
