Fransa, Strasburq, 23 iyun/ Trend , müxbir A.Məhərrəmli, İ.Əlizadə/ Avropa Şurası Parlament Assambleyasının (AŞPA) Azərbaycan üzrə həmməruzəçisi Andres Herkel hesab edir ki, Azərbaycanda keçiriləcək prezident seçkisi öncəsi ölkədə əlverişli vəziyyətin yaradılması üçün yollar axtarmaq lazımdır. "İndiki mərhələdə ölkədə əlverişli seçkiöncəsi vəziyyətin yaradılması haqqında düşünmək lazımdır",-deyə bazar ertəsi Strasburqda Azərbaycan jurnalistlərinə açıqlamasında AŞPA-nın Azərbaycan üzrə həmməruzəçisi Andres Herkel bildirib.
Trend -un arayışı: 2001-ci il yanvarın yeddisində Azərbaycan Avropa Şurasına tam hüquqlu üzv olarkən, öz üzərinə öhdəliklər götürüb. Bu öhdəliklərin yerinə yetirilməsinə nəzarət etmək üçün AŞPA tərəfindən Azərbaycan üzrə həmməruzəçilər təyin olunub.
Azərbaycanda prezident seçkisi 2008- ci il oktyabrın 15- də keçiriləcək.
Bu gün Strasburqda AŞPA-nın yay sessiyası başlayıb. Sabah sessiyada Azərbaycandakı vəziyyətlə bağlı həmməruzəçilərin hazırladıqları məruzə müzakirə olunacaq.
Herkel qeyd edib ki, həmməruzəçilərin indiki və əvvəlki hesabatlarından görünür ki, ölkədə hələ də müəyyən problemler var.
Onun sözlərinə görə, həmməruzəçilərin Azərbaycanın Avropa Şurası qarşısında götürdüyü öhdəliklərin yerinə yetirilməsi və ölkədəki vəziyyətlə bağlı hazırladıqları hesabatda həm siyasi məhbuslar, həm də söz azadlığının vəziyyəti öz əksini tapıb: "Bir necə jurnalist hələ də həbsdədir. Məruzəmizdə əsas saydığımız məsələlərdən olan Seçki Məcəlləsinə və digər Qanunlara da toxunacağıq. Hesab edirəm ki, Venesiya Komissiyasının Seçki Məcəlləsi ilə bağlı bir necə tövsiyəsi, təəssüf , nəzərə alınmayıb".
Məqalə müəllifi ilə əlaqə ünvanı: [email protected]
