Azərbaycan, Bakı, 28 iyun/ Trend , müxbir C.Babayeva/ Azərbaycanın səkkiz müxalifət partiyasının təmsil olunduğu "Bizim Azərbaycan" bloku prezident seçkisindən sonra siyasi partiyaya çevriləcək. Bu barədə şənbə günü Trend - a blokun sədri Vüqar Bəyturan məlumat verib.
Trend -un arayışı: "Bizim Azərbaycan" bloku 2003-cü il keçirilən prezident seçkiləri dövründə prezidentliyə namizəd olan Müsavat Partiyasının başqanı İsa Qəmbərin namizədliyini dəstəkləmək üçün yaradılıb. Sonradan Müsavat Partiyası bloku tərk edib. Blokun Sədrlər Şurası prezident seçkisində "Azərbaycan Naminə" İctimai Forumun rəhbəri Eldar Namazovun namizədliyini dəstəkləmək barədə qərar qəbul edib. Azərbaycanda prezident seçkisi oktyabrın 15-də keçiriləcək. "Bizim Azərbaycan" blokunda təmsil olunmuş Fədailər partiyası, blokun dəstəkləyəcəyi namizəd partiyanın mövqeyini əks etdirmədiyinə görə, qurumu tərk edib.
Bəyturanın sözlərinə görə, 2006 - cı ildə blok daxilində birləşdirici komissiya yaradılıb və sonradan, blokun qərarı ilə, həmin komissiyanın fəaliyyəti dayandırılıb və blok kimi fəaliyyətə üstünlük verilib. "Hazırda birləşdirici komissiya bərpa olunub və "Bizim Azərbaycan" bloku prezident seçkisindən sonra vahid siyasi partiya kimi fəaliyyətini davam etdirəcək", - deyə o bildirib.
Blok sədrinin bildirdiyinə görə, Fədailər partiyası bloku tərk etsə də, hazırda blokda yenə də səkkiz partiya təmsil olunur. Belə ki, Milli Qurtuluş Partiyası "Bizim Azərbaycan" blokuna daxil olmaq barədə qərar qəbul edib.
Məqalə müəllifi ilə əlaqə saxlamaq üçün ünvan - [email protected]
