Azərbaycan, Bakı, 07 iyul/ Trend , müxbir E.Babayev/ Azərbaycanın müxalif Müsavat Partiyası qarşıdan gələn prezident seçkisi ilə bağlı müzakirələri yekunlaşdırmaq barədə qərar verib. "Divanın bu gün keçirilən iclasında qərara alındı ki, müzakirələr artıq yekunlaşsın" - deyə bazar ertəsi Trend -a Müsavatın Mərkəzi İcra Aparatının rəhbəri Arif Hacılı partiya Divanınsy iclasından sonra bildirib.
Trend -un arayışı: Azərbaycanda prezident seçkisi oktyabrın 15 - də keçiriləcək. Müsavat Partiyasının Məclisi ötən ilin dekabrında təşkilatın başqanı İsa Qəmbərin namizədliyini irəli sürüb. Milli Məclis Seçki Məcəlləsinə əlavə və dəyişiklikləri təsdiq etdikdən sonra, Müsavat partiyanın rayon təşkilatlarında seçkiyə gedib-getməməklə bağlı müzakirələr aparmağa başlayıb.
İyunun 2 - də Milli Məclisin qərarı ilə Seçki Məcəlləsində bir sıra dəyişikliklər edilib. Seçki kampaniyasının müddəti 120 gündən 75 günə endirilib. 75 günün 28-i təşviqat işlərinə, qalan günlər namizədin müəyyən edilməsi, onun qeydə alınması üçün imzaların toplanması, imzaların Mərkəzi Seçki Komissiyası tərəfindən yoxlanılması və digər prosedur tədbirlərinə sərf olunacaq. Bundan başqa, namizədin dəstəklənməsi üçün lazım olan imzaların sayı, əvvəllər olduğu kimi, 45 min yox, 40 min müəyyən edilib, dövlət KİV- də seçki təbliğatı qadağan olunub.
Hacılı bildirib ki, Divanda qərara alınıb ki, yaxın 1-2 həftə ərzində müzakirələr tam başa çatdırılsın və bunun ardınca yekun qərar açıqlansın. "Qərar verilərkən rayon təşkilatlarının rəyi nəzərə alınacaq" -deyə o bildirib.
Müxalifəti təmsil edən Müsavat Partiyası 1992 - ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
