Qazaxıstan, Almaatı, 08 iyul/ Trend , müxbir R.Məşədihəsənli/ 1944-cü ildə Gürcüstandakı ata-baba yurdundan Orta Asiya və Qazaxıstana sürgün olunmuş Ahısqa türklərinin repatriasiyasına dair Gürcüstan hökumətinin çıxardığı qərarı müzakirə etmək üçün Ahısqa türklərinin liderləri gələn həftə Tbilisiyə səfər edəcəklər.
"Gürcüstan hökumətinin Ahısqa türklərinin repatriasiyası haqda qərarı yetkin deyil və biz bunu müzakirə etmək üçün bu ölkəyə səfər edəcəyik", - deyə Dünya Ahısqa Türkləri Koordinasiya Şurasının sədri, Qazaxıstan Ahısqa Milli Mərkəzinin prezidenti Ziyaeddin İsmixanoğlu Trend -a bildirib.
Ahısqa türklərinin nümayəndə heyəti Gürcüstan prezidenti Mixail Saakaşvili ilə görüşüb, problemləri barədə onunla müzakirə aparmaq niyyətindədir.
İsmixanoğlu bildirib ki, repatriasiyaya dair qərarda bir sıra çatışmazlıqlar var: "Məsələn, vətənə qayıdış və bəraət üçün ərizələrin qəbulu müddəti çox qısadır. Yəni, dünyanın 10 ölkəsində yaşayan ahısqalılar 2009-cu il yanvarın 1-dək ərizə ilə Gürcüstan dövlətinə müraciət etməyi çatdıra bilməyəcəklər. Çünkü bu müddət çox azdır", - deyə ahısqalıların lideri bildirib.
İsmixanoğlu əlavə edib ki, iki gün əvvəl Astana şəhərinin 10 illik yubiley tədbirləri və prezident Nursultan Nazarbayevin doğum günü ilə əlaqədar qonaqlığa qatılan Türkiyə prezidenti Abdulla Güllə görüşərək bu məsələni ətraflı müzakirə edib. Onun sözlərinə görə, Gül Türkiyə hökumətinin hər zaman Ahısqa türklərinin yanında olduğunu deyib və Gürcüstan prezidenti Saakaşvili ilə bu məsələ barədə fikir mübadiləsi aparacağına vəd verib.
