Azərbaycan, Bakı, 31 iyul / Trend , müxbir C.Babayeva/ Müxalif Azərbaycan Yolu Siyasi Hərəkatı (AYSH) builki prezident seçkisində iştirak etməmək barədə qərar qəbul edib. AYSH hesab edir ki, Seçki Məcəlləsinə edilmiş son əlavə və dəyişikliklər prezident seçkisinin demokratik keçiriləcəyini şübhə altına alıb, Konstitusiyada nəzərdə tutulmuş söz və mətbuat azadlığı, insanların sərbəst toplaşmaq hüququ hədsiz dərəcədə məhdudlaşdırılıb. "Belə bir ağır şəraitdə prezident seçkisinə qoşulmaq haqda qərar qəbul etmək milli maraqlardan daha çox koorperativ maraqlara xidmət etmək deməkdir. Bu qərarlar daha çox imitasiya xarakterlidir və hər hansı uğurdan söhbət gedə bilməz", Trend -a cümə axşamı AYSH-nin Koordinasiya Şurasının prezident seçkisi ilə bağlı daxil olan bəyanatında bildirilib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtidaryönlü Ana Vətən və Sosial Rifah partiyaları seçkidə İlham Əliyevin namizədliyini müdafiə etmək qərarı veriblər. Müxalif Vəhdət və Tərəqqi partiyaları da İlham Əliyevi müdafiə etmək barədə qərar verəcəklərini bildiriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot etməsi ilə bağlı yekun qərar qəbul edib. Azərbaycanın Demokratik İslahatlar Partiyası prezident seçkisində müşahidəçi mövqeyi tutacaq.
Bəyanatda AYSH-nin prezident seçkisində hər hansı bir namizədi dəstəkləməyəcəyi bildirilib. "Koordinasiya Şurası bu günə qədər prezident seçkisində iştirak etmək niyyətini bildirən şəxslərin heç birini Azərbaycanın prezidenti postunu tutmağa layiq görmür və bu səbəbdən də hər hansı bir namizədə dəstək vermək fikrindən uzaqdır", - deyə bəyanatda vurğulanıb.
"Prezident seçkisində iştirak etməməsinə baxmayaraq, AYSH siyasi fəaliyyətini hər bir seçicinin hüquqlarının və ümumilikdə xalqın maraqlarının qorunması yolunda sivil mübarizə çərçivəsində davam etdirəcək", - deyə bəyanatda bildirilib.
Trend -un arayışı: Müxalif Azərbaycan Yolu Siyasi Hərəkatı 2004-cü ildə yaradılıb. Hərəkatın sədri Rusiyanın istefada olan ədliyyə general-leytenantı İlqar Qasımovdur.
Məqalə müəllifi ilə əlaqə saxlamaq üçün ünvan: [email protected]
