Azərbaycan, Bakı, 01 avqust / Trend , müxbir E.Tanrıverdiyeva/ Bosniya Müsəlmanları Assosiasiyasının vəkili Frensis Boylın rəyinə görə, 1990-cı illərin ortalarında ABŞ Dövlət Katibinin keçmiş köməkçisi Riçard Holbruk Haaqa tribunalı tərəfindən səkkiz min Srebrenits sakininin öldürülməsində ittiham olunan Bosniya serblərinin eks-lideri Radovan Karaciç ilə əlbir olub.
"Bütün faktlar Holbrukun keçmiş Yuqoslaviya ərazisində baş verən müharibə zamanı Karaciçə hərbi cinayətin törədilməsində hər cür yardım göstərdiyindən xəbər verir", - deyə Trend -a cümə günü Bosniya prezidenti Əli İzetbeqoviçin rəsmi hüquq müşaviri və Bosniya hökumətinin Beynəlxalq Məhkəmədə nümayəndəsi olan Boyl bildirib.
Hərbi cinayətlərdə ittiham olunan Bosniya serblərinin keçmiş lideri Karaciç cümə axşamı Haaqa tribunalı qarşısında durarkən Birləşmiş Ştatların BMT-dəki keçmiş nümayəndəsi olan və Bosniyada sülhün bərqərar edilməsi üzrə Deytonsk razılaşmasının "memarı" hesab olunan Holbruk ilə onlar arasında hansısa sazişin olduğunu bildirib.
"1996-cı ildə Holbruk mənə hər vasitə ilə ictimai həyatdan imtina etməyi təklif etdi və bunun əvəzində isə ABŞ öz öhdəliklərini yerinə yetirməli idi", - deyə Karaciç bildirib.
İTAR-TASS İnformasiya Agentliyinin verdiyi məlumata görə, ABŞ Dövlət Departamenti bu məlumatı təkzib edib. Dövlət Departamentinin rəsmi nümayəndəsi Şon Makkormakın bildirdiyinə görə, Holbruk Karaciçlə heç bir sövdələşmə bağlamayıb.
Küllü miqdarda fakt Holbruk və Karaciç arasında sazişin olduğunu ortaya çıxarır.
" İnterfaks " Agentliyinin verdiyi xəbərə görə, Bosniya serblərinin keçmiş liderinin qardaşı Luka Karaciç Radovan Karaciçin ABŞ prezidentinin Balkanlardakı xüsusi nümayəndəsi Holbruk ilə əvvəllər razılaşmanın mövcud olduğunu təsdiq edib.
Amerikalı hüquq müdafiəçisi Boyl, Karaciçin bəyanatında həqiqətin olduğuna əmindir.
"Əlbəttə, mən Holbruk və Karaciç arasında baş tutan hansısa gizli danışıqlarda şəxsən iştirak etməmişəm. Lakin bütün faktlar, sözsüz ki, Holbrukun keçmiş Yuqoslaviya ərazisində hərbi cinayətlərə dəstək göstərməsindən xəbər verir", - deyə "Srebrenitsa anaları"nın vəkili, keçmiş Yuqoslaviya üzrə Beynəlxalq Hərbi Tribunalda onların maraqlarını təmsil edən Boyl bildirib.
Boylın sözlərinə görə, şübhəsiz ki, Karaciçin bosniyalılara qarşı törətdiyi cinayət, soyqırım və etnik təmizləmədə Holbrukun da əli var. "Holbruk cinyət yoldaşı kimi Karaciç ilə birgə hərbi tribunala verilməlidir", - deyə o bildirib.
Bundan əlavə, hüquq müdafəçisi əmindir ki, bu ittihamları Butros Butros-Qali, Kofi Annan, Yasusi Akasi, Devid Ougn, Torvald Stoltenberq və Karl Bildtə qarşı da irəli sürmək olar.
Boylın fikrincə, Karaciçin məhkəmədə özünü müdafiə etməyi planlaşdırması yuxarıda adları çəkilən şəxslər və onların "sahibləri" üçün olduqca təhlükəlidir və heç kim onu bu insanlara qarşı ittihamlardan və sübutlardan saxlaya bilməz.
Vəkil təsdiq edir ki, Karaciç qərb "vasitəçiləri"nin cinayətlərdə ona necə dəstək göstərilməsi bardə hər şeyi bilir.
"Mən müştərilərim - "Srebrenits anaları" Təşkilatı adından bu insanlara qarşı yeni informasiyalardan istifadə etmək üçün bu hərbi cinayətlərin təhqiqatını diqqətlə izləycəyəm", - deyə Boyl bildirib.
Bosniyanın "Srebrenits anaları" Təşkilatının vəzifəsi 10 mindən çox insanın itgin düşməsinin araşdırılması və 1995-ci il 11 iyul tarixində Bosniya və Herseqovina ərazisində, Serebrenitsdə Bosniyanın serb ordusu tərəfindən törədilən kütləvi ölüm hallarını araşdırmaqdan ibarətdir.
Vəkil əmindir ki, o, müştəriləri adından bu qərb "vasitəçiləri" və diplomatlarını məsuliyyətə cəlb etmək üçün onlara qarşı yeni informasiyalardan istifadə edə bilər. Boyl hesab edir ki, Karaciç ömrünün sonunu həbsxanada keçirəcək.
Boyl keçmiş Yuqoslaviya üzrə Beynəlxalq Tribunalın keçmiş prokuroru Karla del Ponteni Serebrenisdəki qırğın və soyqrım da daxil olmaqla, bütün cinayətləri törətməkdə Slobadan Miloşeviçi təqsirləndirməyə inandıra bilənlərdən biridir.
Vəkil hesab edir ki, Qərb üçün Karaciçin həbsi əvvəllər mümkün idi, lakin arzuolunan deyildi.
Onun sözlərinə görə, 1993-cü ildə Cenevrədə sülh konfransının gedişi zamanı prezident İzetbeqoviç Karaciçin əlini sıxıb. Hətta Bosniya serblərinin lideri ABŞ vizası alaraq, Nyu-Yorka Vans-Ouen konfransına gəlmişdi.
Boyl hesab edir ki, Dövlət Departamenti Karaciçi həbs etməli idi. Onun sözlərinə görə, Karaciç Nyu-Yorka gəldiyi təqdirdə, ABŞ-ın onu həbs etmək və təhqiqata başlamaq üçün öhdəliyi var idi. Lakin onlar əksinə, ona viza və mühafizə verdilər.
Keçmiş Yuqoslaviya üzrə Beynəlxalq Tribunal 1993-cü ildə Birləşmiş Millətlər Təşkilatı tərəfindən yaradılıb. O, Hollandiyanın Haaqa şəhərində yerləşir və bu səbəbdən onu Haaqa məhkəməsi adlandırırlar. Bu məhkəməni 90-cı illərin ortalarında Balkan münaqişəsi zamanı törədilmiş hərbi cinayətləri aşkara çıxarmaq üçün yaradıblar.
"Onlar hərbi cinayətkarları, soyqırım törədənləri müadfiə edirdilər. Bax bu da böyük dövlət", - deyə Boyl bildirib.
Məqalə müəllifi ilə əlaqə ünvanı: [email protected]