Azərbaycan, Bakı, 04 avqust / Trend , müxbir İ.Əlizadə/ Azərbaycan parlamentində müxalifəti təmsil edən Müsavat deputat qrupu oktyabrın 15-də keçiriləcək prezident seçkisini boykot edəcək.
"Müsavat deputat qrupunun üzvlərindən dördü Müsavat Partiyasının üzvüdür və onlar partiyanın boykot qərarına uyğun hərəkət edəcəklər. Mən də demokratik müxalifətin mövqeyinə uyğun olaraq seçkidə iştirak etməyəcəm", bazar ertəsi Trend -a Müsavat deputat qrupunun üzvü Pənah Hüseyn bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Müxalifəti təmsil edən Müsavat, Demokrat, Klassik Xalq Cəbhəsi partiyaları, üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku seçkiləri boykot edəcəyi barədə qərar verib. Vətəndaş Həmrəyliyi, Kommunist, Böyük Quruluş partiyaları isə seçkidə öz namizədi ilə çıxış etməyəcək. Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Liberal Demokrat Partiyasının sədri Fuad Əliyev, Bütöv Azərbaycan Xalq Cəbhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən rəsmən irəli sürülüb.
Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürüb.
Deputat hesab edir ki, müxaifətin böyük əksəriyyətinin prezident seçkisini boykot etməsi seçkiqabağı yaranmış vəziyyətə uyğundur: "Müsavat deputat qrupu sentyabrda prezident seçkisi ilə bağlı qərarını rəsmiləşdirəcək".
Müsavat deputat qrupunun beş üzvü var.
Məqalə müəllifi ilə əlaqə ünvanı: [email protected]
