Azərbaycan, Bakı, 06 avqust / Trend , müxbir C.Babayeva/ Azərbaycanın müxalif Müsavat Partiyasının Ağstafa, Qazax və Sabirabad rayon təşkilatlarının bir qrup üzvü təmsil olunduqları partiyanın sıralarından istefa verərək siyasi fəaliyyətlərini Azərbaycan Yolu Siyasi Hərəkatında (AYSH) davam etdirməyə qərar veriblər. Çərşənbə günü Trend -a daxil olan bəyanata əsasən, partiyanın Sabirabad rayon təşkilatından sədr müavini başda olmaqla 16, Ağstafa rayon təşkilatından 13, Qazax rayon təşkilatından isə 11 partiya üzvü istefa verib.
Bəyanat müəllifləri bildiriblər ki, 2008-ci il - Azərbaycanda prezident seçkisi ilində müxalifət partiya liderlərinin vahid siyasi platformasının olmadığı məlum oldu. "Uzun illər buna çalışılsa da, müxalif partiyaların siyasi güc mərkəzinin yaradılmasına nail olunmayıb. Bu gün Azərbaycanda yeni siyasi münasibətlər qura biləcək güc mərkəzinə ehtiyac duyulur", - deyə bəyanatda bildirilib.
Sabirabad rayon təşkilatından istefa bəyanatına həmçinin üç nəfər Azərbaycan Xalq Partiyasından, bir nəfər isə Azərbaycan Xalq Cəbhəsi Partiyasından imza atıb.
Trend -un arayışı: Hazırda AYSH-nin Ağstafa rayon təşkilatının sədri olan Fəxrəddin Dəlqi iki il öncə Müsavat Partiyasının həmin rayon təşkilatının sədrliyindən istefa verib.
Azərbaycanın müxalif Müsavat Partiyasının İcra Aparatının rəhbəri Arif Hacılı məlumatı təkzib edib və Azərbaycan Yolu Siyasi Hərəkatının seçki öncəsi ucuz reklamla məşğul olduğunu deyib.
Məqalə müəllifi ilə əlaqə ünvanı: [email protected]