Azərbaycan, Bakı, 07 avqust / Trend , müxbir E.Babayev/ Müxalif Azərbaycan Xalq Cəbhəsi Partiyasının (AXCP) Ali Məclis sədri hesab edir ki, ölkə müxalifətinin bir qisminin prezident seçkisindən iştirakdan imtinası bu düşərgənin zəifləməsinə gətirib çıxaracaq. "Seçkidə iştirak etməmək müxalifətdə itkilərin baş verməsinə gətirib çıxara bilər", cümə axşamı Trend -a AXCP Ali Məclisinin sədri Qulamhüseyn Əlibəyli bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət qurumunun (Xalq Cəbhəsi, Milli Birlik Hərəkatı, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi Partiyası seçkiləri boykot etmək barədə qərar verib. Müsavat, Vətəndaş Həmrəyliyi, Demokrat, Böyük Quruluş partiyaları isə seçkidə öz namizədləri ilə iştirakdan imtina ediblər.
İndiyə qədər qarşıdan gələn prezident seçkilərində iştirak etmək üçün Mərkəzi Seçki Komissiyasına (MSK) 11 nəfər müraciət edib. Siyasi təşkilatlardan hakim Yeni Azərbaycan Partiyasının namizədi İlham Əliyevin, Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Liberal-Demokrat Partiyasının sədri Fuad Əliyevin, Yaşıllar Partiyasının sədri Mais Güləliyevin sənədləri MSK-ya təqdim edilib. Bundan başqa, Yaşar Əhmədovun (işsiz), Əlimuxtar Əkbərovun (təqaüdçü), Sevinc Quliyevanın (Sumqayıt Mərkəzi Klinik Xəstəxanasında sanitar), Vüqar Seyidovun (həkim), Qüdrət İsaqovun (AMEA-nın Fizika İnstitutunun aparıcı elmi işçisi) sənədləri MSK-ya təqdim edilib.
Əlibəyli hesab edir ki, əksər müxalifət partiyalarının seçkidə iştirakdan imtinası seçki prosesinə təsirsiz ötüşəcək. "Artıq seçki prosesi başlayıb. Mən müxalifətin bu prosesdə iştirak edib-etməməsinin əhəmiyyətini görmürəm. Müxalifətin seçki ilə bağlı qərarlarının seçki prosesinə bir təsiri olmayacaq", - deyən Əlibəyli vurğulayıb ki, müxalifətin əsas partiyalarının seçkidə iştirakdan imtinası bu qüvvələrin növbəti seçkilərə hazırlığına da mənfi təsir göstərəcək. "Təbii ki, prezident seçkisində iştirakdan imtina etmək 2010-cu il parlament seçkilərinə hazırlığa da təsir göstərəcək. Çünki hər bir seçki nəticələrdən asılı olmayaraq, növbəti seçkiyə hazırlığın bir mərhələsi kimi qiymətləndirilməlidir. Müxalifətin prezident seçkisində iştirakdan imtinası parlament seçkilərinə hazırlığa mənfi təsir edəcək", - deyə AXCP rəsmisi qeyd edib. Onun sözlərinə görə, mövcud müxalifətin seçkidə iştirak etməməsinin yeni partiyaların yaranması ilə müşahidə olunması da mümkündür. "Mən yeni qüvvələrin yaranacağı fikri ilə razı deyiləm. Çünki əslində, yeni müxalifət adı ilə çıxış edən bu qüvvələr belə deyək ki, köhnə siyasətçilər olurlar. Onlar başqa bir partiya yaradırlar və yeni qüvvə kimi ortaya çıxırlar. Digər tərəfdən, indi seçki öncəsi yaranmış bu vəziyyətdə kimsə namizədliyini verə və ya yeni partiya yarada bilər. Belə şəxslər olsa belə, onlar mövcud qüvvələrin içərisindən çıxacaqlar", - deyə Əlibəyli bildirib.
Müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000-ci ilə qədər sədri Azərbaycanın eks-prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.
Məqalə müəllifi ilə əlaqə ünvanı: [email protected]