Azərbaycan 2007-ci ildə ABŞ-dan 2,5 mln. dollar dəyərində silah-sursat və hərbi texnika alıb. Bu barədə ABŞ Dövlət Departamentinin 2007-ci ildə Amerika silahlarının digər ölkələrə satışı (Direct Commercial Sales Export Authorizations for Fiscal Year 2007) üzrə hesabatında bildirilir.
"Washington ProFile"nin verdiyi məlumata görə, bu sənəddə Amerika istehsalçıları tərəfindən həyata keçirilən yeni silah və hərbi ləvazimatların birbaşa satışı qeyd olunub. Hesbata görə, bütün keçmiş Sovet İttifaqı dövlətləri Amerikadan silah-sursat alıb.
Rusiya 2007-ci ildə təqribən 40,7 mln. dollar həcmində odlu silah və döyüş sursatı, elektronika, raket, aviasiya texnikası və avadanlıq, partlayıcı maddələr, yanğından idarəetmə sistemi, kosmik sistem və avadanlıq alıb. Ukrayna isə 3,4 mln. dollar həcmində odlu silah və döyüş sursatı, elektronika və hərbi ləvazimat alıb.
Ermənistan 487,2 min dollar həcmində aviasiya texnikası və radioelektronika, Azərbaycan 2,5 mln. dollar məbləğində raket texnikası, torpeda, bombalar, gəmi avadanlıqları və elektronika, Gürcüstan 25 mln. dollar həcmində odlu silah və döyüş sursatı, zirehli texnika, elektronika, aviasiya texnikası və avadanlığı, şəxsi müdafiə vasitələri əldə edib.
Qazaxıstan 861,6 min dollar həcmində partlayıcı maddlər, aviasiya texnikası və avadanlıq, artileriya sistemi, zirehli texnika, Qırğızıstan 20 mln. dollar həcmində elektronika, artileriya sistemi, Tacikistan 7 mln. dollar məbləğində elektronika, kimyəvi və bioloji müdafiə əlayhinə vasitələr, Türkmənistan 100 min dollarlıq elektronika, Özbəkistan 79 min dollar həcmində yardımçı hərbi avadanlıq, Latviya 4,4 mln. dollar, Litva 2,55 mln. dollar, Estoniya 2 mln. dollar həcmində Amerika istehsalı olan silah-sursat alıb. Ötən il Amerika silahlarını yalnız Belarus və Moldova almayıb.
Bu statistikaya əvvəllər imzalanmış müqavilələr çərçivəsində servis xidmətləri, ehtiyat hissələrinin çatdırılmasına dair məlumatlar daxil edilməyib. Misal üçün, 2007-ci ildə ABŞ-dan silah-sursat almayan Moldova əvvəllər Amerikadan aldığı hərbi elektronikanın yenilənməsinə və xidmətə görə 100 min dollar sərf edib.
Sövdələşmlərdən əlavə, Dövlət Departamentinin verdiyi məlumata görə, ABŞ-ın Müdafiə Nazirliyi (Department of Defense) də xaricə hərbi texnika tədarük edir. Bu silahlar Amerika hərbi anbarlarından adətən digər dövlətlərin silahlı qüvvələri ilə tərəfdaşlıq proqramı çərçivəsində verilir və ya satılır. 2007-ci il üzrə bu məlumatlar hələ açıqlanmayıb.
Hesabatda göstərilir ki, 2007-ci ildə Amerika silahlarının dünya üzrə satışı 24 mlrd. 531 mln. dollar təşkil edib. Keçmiş SSRİ dövlətləri isə iri alıcılar sırasına daxil deyil, lakin onların alma qabiliyyəti tədricən artmaqdadır.