Azərbaycan, Bakı, 07 oktyabr/ Trend , müxbir R.Novruzov/ GUAM-ın müşahidəçilər missiyası Azərbaycanda keçiriləcək prezident seçkisində daha həcmli monitorinq keçirməyi planlaşdırır.
"Biz daha həcmli monitorinq keçirməyə və həm paytaxtdakı, həm də Azərbaycanın regionlarındakı seçki məntəqələrinin böyük hissəsinə baş çəkməyə çalışacağıq", - "Demokratiya və iqtisadi inkişaf uğrunda təşkilat - GUAM"ın Baş katibi Valeri Çeçelaşvili çərşənbə axşamı Kiyevdən telefonla Trend - a bildirib.
GUAM, Azərbaycanda oktyabrın 15 - nə təyin edilən prezident seçkisinin gedişini müşahidə etmək üçün oktyabrın 13 - də Baş katibin başçılığı ilə missiya göndərəcək.
Tərkibi dəqiqləşdirilməkdə olan missiya oktyabrın 13 -17- də monitorinq aparacaq, Azərbaycan prezidenti vəzifəsinə namizədlərlə görüşəcək,- Çeçelaşvili bildirib.
Azərbaycanda prezident seçkisi oktyabrın 15 - də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, hazırkı dövlət başçısı İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
GUAM-ın formatı 1997- ci ildə Strasburqda Avropa İttifaqı dövlət başçılarının Sammitində postsovet dövlətləri tərəfindən yaradılıb. 1999 - cu ildə Özbəkistan bu formata daxil olsa da, dörd ildən sonra onu tərk edib. 2006 - cı ildə Kiyevdə ilk sammit zamanı GUAM-ın beynəlxalq təşkilat və "Demokratiya və iqtisadi inkişaf uğrunda təşkilat- GUAM" kimi elan olunması haqda qərar qəbul olunub.
Müəlliflə əlaqə saxlamaq üçün elektron ünvan: trend