Azərbaycan, Bakı, 17 oktyabr / Trend , müxbir A.Hüseynbala/ Azərbaycanın eks-prezidenti Ayaz Mütəllibov 1991-ci il oktyabrın 18-də parlamentdə Azərbaycanın dövlət müstəqilliyi haqqında Konstitusiya aktının qəbulunun əleyhinə olmadığını bildirib.
"Həmin vaxt müsətqilliyin əleyhinə olmağımla bağlı yayılan məlumatların heç bir əsası yoxdur", - cümə günü Moskvadan telefonla Trend -a Azərbaycan Sosial Demokrat Partiyasının (ASDP) həmsədri Ayaz Mütəllibov bildirib.
Trend -ın arayışı: 1991-ci il martın 7-i Azərbaycanın tarixində ən mühüm günlərdən biridir. O zaman Müstəqil Azərbaycan Deputat Blokunun (Demblok) üzvləri və digər istiqlalçı deputatlar Ali Sovetdə böyük cəsarət göstərərək qəti şəkildə Azərbaycanın SSRİ-nin tərkibindən çıxmasını tələb edirdilər.
Nəhayət, martın 7-də Ali Sovetdə keçirilən səsvermədə 254 lehinə, 6 nəfər bitərəf olmaqla cəmi 43 nəfər istiqlalçı millət vəkili SSRİ-nin saxlanması ilə bağlı Azərbaycanda referendum keçirilməsinin əleyhinə, ölkəmizin dövlət müstəqilliyinə səs verdi. Məhz bundan sonra xalq hərəkatının təzyiqi və istiqlalçı "43-lər"in apardıqları ardıcıl gərgin və qətiyyətli mübarizə sayəsində 1991-ci il avqustun 30-da Ali Sovet dövlət müstəqilliyinin bərpası haqqında Bəyannamə, oktyabrın 18-də isə Azərbaycan Respublikasının dövlət müstəqilliyi haqqında Konstitusiya Aktı qəbul etdi.
1918-ci il mayın 28-də Şərqdə ilk müstəqil respublika - Azərbaycan Demokratik Cümhuriyyəti yaradılıb. Lakin bu cümhuriyyət cəmi iki il yaşadı və 1920-ci il aprelin 28-də Sovet ordusu tərəfindən süquta uğradılaraq, SSRİ-nin tərkibinə daxil edildi.
ASDP sol təmayüllü müxalifət partiyasıdır. Partiyanın həmsədri Araz Əlizadə, digər həmsədri isə Azərbaycanın eks-prezidenti hazırda mühacirətdə yaşayan Ayaz Mütəllibovdur. 1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır.
Eks-prezident Azərbaycanın Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevrilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir.
Mütəllibov bildirib ki, müstəqillik Azərbaycan üçün çox şey verib.
"Amma mən Azərbaycanın ilk prezidenti kimi mühacirətdə yaşamaqdayam", - eks-prezident vurğulayıb.
Müstəqillik aktının lehinə səs verən Milli Azadlıq Hərəkatının fəallarından olan, hazırda müxalif Milli İstiqlal Partiyasının lideri Etibar Məmmədov isə cümə günü Trend -a bildirib ki, Mütəllibovun prezident kimi ölkənin müstəqilliyinə mövqeyi birmənalı olmayıb.
"Həmin dövrdə Mütəllibov guya Azərbaycan xalqının böyük əksəriyyətinin SSRİ-nin tərkibində qalmasının tərəfdarı olduğunu bildirmişdi. Ona görə də bununla bağlı referendumun keçirilməsini istəyirdi. Sonra Moskvada SSRİ-nin dağlıması ilə bağlı baş verən proseslərdən sonra bu məsələyə münasibəti dəyişdi", - Məmmədov əlavə edib.
Məqalə müəllifi ilə əlaqə ünvanı: [email protected]
