Azərbaycan, Bakı, 01 dekabr/ Trend , müxbir A.Hüseynbala/ Azərbaycanın müxalifət partiyalarının yeni koalisiyanın yaradılması məsələsində vahid mövqeyə gələ bilməməsinin səbəbi qarşılıqlı razılaşmanın əldə edilməməsi ilə bağlıdır.
"Azadlıq" blokunda təmsil olunan Azərbaycan Xalq Cəbhəsi Partiyası (AXCP) Müsavatla birgə mübarizə aparmaq niyyətinə düşərsə, biz bunun əleyhinə olmayacağıq", - bazar ertəsi Trend -a "Azadlıq" blokunda təmsil olunan Azərbaycan Liberal Partiyasının (ALP) sədr əvəzi Əvəz Temirxan bildirib.
Trend -un arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiyası və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15-də keçirilən prezident seçkisinin nəticələrinin qanunsuz olması barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasınin yaranması baş tutmur.
Onun sözlərinə görə, AXCP bu fikirdə deyil. "Müxalifətin yeni yaranacaq birliyində Klassik Xalq Cəbhəsi Partiyası (KXCP) da təmsil olunmalıdır. Azərbaycan Demokrat Partiyası ilə əməkdaşlıq məsələsinin müzakirəyə çıxarılması isə xeyirdən çox zərərlidir", - Temirxan qeyd edib.
ALP-nin sədr əvəzinin fikrincə, Müsavat müxalifətin birliyini istəmir. "Əməkdaşlıq səmimi olmalıdır. Sağ əllə birliyə imza atıb, sol əllə onu pozmaq düzgün olmaz. Müsavat Partiyasınnı rəhbərliyində təmsil olunan funksionerlərin son açıqlamaları müxalifəti Azərbaycan cəmiyyətinin gözündən salır, müxalifətdaxili münasibətləri daha da pisləşdirir", - Temirxan vurğulayıb.
"Biz real müxalifət partiyalarının bir yerdə olmasını arzulayan tərəfik", - bazar ertəsi Trend -a "Azadlıq" blokunda təmsil olunan Vətəndaş və İnkişaf Partiyasının (VİP) sədri Əli Əliyev bildirib.
Onun sözlərinə görə, Müsavat Partiyası Müxalifətin Əməkdaşlıq Mərkəzində (MƏM) təmsil olunan siyasi təşkilatların gələcək əməkdaşlığına maraqlı deyil. "Müsavat birinci mərhələdə MƏM-in tərkibinin genişləndirilməsi üçün bir neçə müxalif partiyanın adlarını da çəkirdi. Həmin partiyalardan rədd cavabı gələndən sonra yeni müzakirə mövzusu ortaya atılıb", - VİP sədri xatırladıb.
Əliyev deyib ki, Müsavat rəhbərliyinin mövqeyinin dəyişməsi bəllidir: "Amma indi bu haqda danışmaq istəmirəm. Müsavat müxalifətin təşkilatlanmasının qarşısını almaq niyyətindədir. Azərbaycandakı siyasi vəziyyəti dəyişə biləcək etimad mərkəzinin yaranmasına ehtiyac var", - müxalif partiyanın sədri bildirib.
Məqalə müəllifi ilə əlaqə ünvanı: [email protected]
