Azərbaycan, Bakı, 29 dekabr/ Trend , müxbir C.Babayeva/ Gürcüstan azərbaycanlıları başa çatan ildə ölkə hökumətinin onların problemlərinin həlli ilə bağlı verdiyi vədləri yerinə yetirməməsindən şikayətlənirlər.
"Gürcüstan hökumətinin 2008-ci ildə bu ölkədə yaşayan azərbaycanlıların problemlərinin həlli ilə bağlı verdiyi vədlər boş vəd olaraq qalıb. Hökumət mövcud problemlərin həlli üçün heç bir tədbir görməyib", - Gürcüstan azərbaycanlılarının "Qeyrət" xalq hərəkatının sədri Əlibala Əsgərov bazar ertəsi Tbilisidən telefonla Trend -a bildirib.
Qeyri - rəsmi məlumatlara görə, Gürcüstanda, əsasən də, Kvemo-Kartli (Borçalı) rayonunda təxminən 500 min azərbaycanlı yaşayır.
Gürcüstan azərbaycanlıları, əsasən, dövlət dilinin öyrənilməsi, doğma dildə təhsil, torpaq sahələrinin alınması və dövlət orqanlarında onlara yüksək vəzifələrin verilməsi ilə bağlı problemlərdən şikayətlənirlər.
Yeni ildə Gürcüstan azərbaycanlıları onların problemlərinin həlli üçün dövlət qurmunun yaradılacağına ümid edirlər. "Gürcüstanad rəsmi olaraq heç bir qurum etnik azlıqların problemlərinin həlli ilə məşğul olmur. Belə qurum yaradılarsa, milli azlıqların mövcud problemlərinin dövlət səviyyəsində həlli imkanı yarana bilər", - o deyib.
Belə qurumun yaradılması məsələsi yalnız parlamentdə müzakirələrin və etnik azlıqların hökumət nümayəndələri ilə görüşlərinin mövzusu olub, - "Qeyrət"in sədri bildirib.
2008 - ci il Gürcüstan və azərbaycanlılar üçün ən ağır il olub, - Gürcüstan Azərbaycanlıları Konqresinin (GAK) sədri Əli Babayev hesab edir. "Gürcüstan ərazisinin itirilməsi, ağır iqtisadi vəziyyət ölkədə yaşayan azərbaycanlıların da həyatına təsir göstərib", - Babayev bazar ertəsi Tbilisidən telefonla Trend -a bildirib.
Gürcüstan azərbaycanlıları gələn il ölkənin siyasi proseslərində fəal iştirak etmək niyyətindədirlər, - Babayev bildirib. "Gürcüstan Azərbaycanlıları Konqressi" azərbaycanlıların problemlərini müdafiə etməyi və onların gürcü cəmiyyətinə inteqrasiyasına köməyi davam etdirəcək", - GAK-ın sədri deyib.
Müəlliflə əlaqə saxlamaq üçün elektron ünvan: [email protected]
