Fransa, Strasburq, 28 yanvar / Trend , müxbir А.Məhərrəmli/ Avropa Şurasının Parlament Assambleyası (AŞPA) nəinki Ermənistanla AŞ arasındakı dialoqu kəsmək fikrində deyil, həmçinin ölkə ilə AŞ və Ermənistanın özündə daxili siyasi qüvvələr arasında onu qaydasına salmaq niyyətindədir", - Trend -a AŞ PA-nın Ermənistan üzrə həmməruzəçisi Jorj Kolombye (George Colombier) deyib.
Çərşənbə axşamı, AŞ PA-nın qış sessiyasının gedişində AŞ PA-dakı erməni nümayəndə heyətinin səlahiyyətlərini dondurmamaq və Monitorinq komitəsinin Ermənistanın təşkilat qarşısında üzərinə götürdüyü öhdəlikləri yerinə yetirməsi üzrə durumun qiymətləndirməsi üçün vaxtın uzadılması qərarı qəbul edilib.
"Ermənistan nümayəndə heyəti səsvermə hüququndan məhrum edilsəydi, biz Ermənistan hökumətini deyil, onun nümayəndəliyini cərimə edəcəkdik. Eyni zamanda, bu qərarla Ermənistan və AŞ arasındakı dialoqu da kəsəcəkdik", - Kolombye bildirib.
AŞPA-nın Monitorinq komitəsi ölkədə 1-2 mart tarixlərində baş vermiş hadisələrin təhqiqatından sonra, dekabrın 17-də səkkiz deputatdan ibarət erməni nümayəndə heyətinin səsvermə hüququndan məhrum edilməsini təklif etmişdi.
Serj Sarkisyanın qələbə qazandığı 2008-ci il prezident seçkilərinin yekunlarından razı qalmayan erməni müxalifətinin etiraz aksiyası, martın 1-də mitinqçilərin hüquq-mühafizə orqanlarının nümayəndələri ilə qarşıdurmalara gətirib çıxarmışdı. Nəticədə 10 nəfər dünyasını dəyişmiş, 265 nəfər yaralanmşdı.
"AŞ PA-da qəbul edilən qərar düzgündür", - həmməruzəçi hesab edir. AŞ PA həmməruzəçisi Ermənistanda ekspertlərdən ibarət işçi qrupun yaradılmasını, barəsində məhkəmə qərarı çıxarılmış 28 nəfərin bağışlanılmasını müsbət irəliləyişlər adlandırıb. "Ümid edirik ki, buna qədər biz irəliləyişlərə şahid olacağıq", - o bildirib.
AŞ PA-nın vitse-prezidenti, Azərbaycan nümayəndə heyətinin başçısı Səməd Seyidov qurumu ikili standartların tətbiqində günahlandırıb. "AŞ ikili standartlar tətbiq edir. Ermənistan isə xaricdəki diasporuna güvənərək istədiyini edir. Ümid edirəm ki, həyata keçirilən prosedurlar Ermənistandakı duruma müsbət təsir edəcək", - Seyidov AŞPA-nın qış sessiyasında çıxış edərkən bildirib.
Seyidovun sözlərinə görə, Ermənistandakı bugünkü durum heç də ürəkaçan deyil.
"Ermənistanda yüzlərlə siyasi məhbus var. Mətbuata təzyiqlər edilir və siyasi partiyaların fəaliyyəti pozulub. Bütün bunlar Ermənistandakı durumun pis olduğunu göstərir", - Seyidov qeyd edib.
"Azərbaycanlılara divan tutan rejim, indi də öz vətəndaşlarına divan tutur", - Azərbaycanın AŞ PA-dakı nümayəndə heyətinin üzvü Gültəkin Hacıbəyli öz çıxışında deyib.
"Azərbaycan və Ermənistan arasında paralellər aparmaq lazım gəlir. Hamı 2008-ci ilin 1 martındakı hadisələrin detalları ilə tanışdır. Buna baxmayaraq, biz o vaxtdan bəri erməni müxalifətini eşitməmişik. 2003-cü ildə Azərbaycanda keçirilən prezident seçkilərindən sonra isə Azərbaycan müxalifətinin lider və nümayəndələri quruma dəvət olunmuşdu. İndi, Avropanın Ermənistan prezidentinin qələbəsini şübhə altına aldığı zamanda biz, mart hadisələrindən sonra heç bir erməni müxalifətinin liderini eşitməmişik. Avropa Şurası ikili standartlar tətbiq edir", - Hacıbəyli əlavə edib.
Məqalə müəllifi ilə əlaqə ünvanı: [email protected]