Azərbaycan, Bakı, 02 fevral/ Trend , müxbir A.Hüseynbala/ Azərbaycanın görkəmli dövlət xadimi Məhəmməd Əmin Rəsulzadənin 125 illik yubileyi münasibətilə Rusiya paytaxtında tədbir keçirilib.
Moskvada fəaliyyət göstərən "Məhəmməd Əmin Rəsulzadə Cəmiyyəti"nin təşəbbüsü ilə təşkil olunan mərasimdə Rərulzadənin həyat və fəaliyyətinə həsr edilən "Azərbaycan Demokratik Respublikası" kitabının təqdimatı olub, - bazar ertəsi Trend -a Müsavat Patiyasının mətbuat xidmətindən bildirilib.
Məlumatda qeyd edilir ki, tədbirdə Rusiyanın və Azərbaycanın tanınmış alimləri, yazıçılar və Rəsulzadənin nəvəsi Rəis Rəsulzadə iştirak edib. Tarixi araşdırmalarına görə Rusiya Elmlər Akademiyası Tarix İnstitutunun əməkdaşı, tarix elmləri doktoru Salavat İsaqov "Məhəmməd Əmin Rəsulzadə Cəmiyyəti"nin medalı ilə təltif edilib.
Rəsulzadə 1884-cü il yanvarın 31-də Bakının Novxanı kəndində anadan olub. Gənc yaşlarından ictimai, siyasi fəaliyyətə başlayan Məhəmməd Əmin istiqlalçılıq, türkçülük ideyalarının daşıyıcısı və təbliğatçılarından olub. "Şərqi-rus", "Hümmət", "Təkamül", "İrşad" qəzetlərində ictimai, siyasi, publisistik yazılarla çıxış edən Rəsulzadənin həmtəsisçiliyi ilə 1911-ci ildə Müsavat Partiyası yaradılıb. 1918-ci ildə isə o, yaxın silahdaşları ilə birgə Azərbaycan Xalq Cümhuriyyətini qurub. Şərqdə ilk müstəqil və demokratik respublika olan Azərbaycan Xalq Cümhuriyyətinin ömrü iki ilə qədər sürüb və 1920-ci ildə Sovet imperiyası tərəfindən suquta uğradılıb. Rəsulzadə və digər görkəmli ziyalılar həbs olunub, sonradan SSRİ rəhbəri Stalinin göstərişi ilə o, həbsdən azad edilib. Lakin görkəmli dövlət xadimi Rəsulzadə ömrünün sonunadək Türkiyədə mühacirətdə yaşayıb, 1955-ci il martın 6-da Ankarada vəfat edib.
Məqalə müəllifi ilə əlaqə ünvanı: [email protected]