Azərbaycan, Bаkı, 16 aprel / Trend , müxbir A.Hüseynbala /
Azərbaycanın hakimiyyətyönlü partiyası bələdiyyə seçkilərinə hazırlıqla bağlı Seçki Qərargahı yaradıb.
"Qərargah bir neçə gündür fəaliyyətə başlayıb və yerli təşkilatlara bələdiyyə üzvlüyünə namizədlərin müəyyənləşdirilməsi üçün tapşırıqlar verilib", - cümə axşamı Trend -a Demokratik Azərbaycan Dünyası Partiyasının (DADP) sədri Məmməd Əlizadə bildirib.
Trend -un arayışı: Azərbaycanda bələdiyyə seçkisi 2009-cu ilin payızında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Əlizadənin sözlərinə görə, DADP bütün seçki məntəqələri üzrə bələdiyyə üzvlüyünə öz namizədlərini irəli sürəcək. Seçkilərdə başqa partiyalarla əməkdaşlığa, seçki bloklarında təmsil olunmağa gəldikdə, partiya sədri deyib ki, buna indiki halda heç bir ehtiyac yoxdur. "Biz gücümüzə güvənirik. Ona görə bələdiyyə seçkiklərində təkbaşına iştirak etməklə kifayət qədər yüksək nailiyyət əldə edəcəyimizə inanırıq", - DADP sədri əlavə edib.
Hakimiyyətyönlü Demokratik Azərbaycan Dünyası Partiyası (DADP) 1992-ci ildə təsis olunub və 1993-cü ildə Ədliyyə Nazirliyi tərəfindən dövlət qeydiyyatına alınıb. Təşkilata Əlizadə rəhbərlik edir. Partiya 1993-cü ildə hakimiyyətə gələn Yeni Azərbaycan Partiyasının siyasətini dəstəkləyir.
Məqalə müəllifi ilə əlaqə ünvanı:[email protected]
