Azərbaycan, Bakı, 29 aprel / Trend , müxbir C.Babayeva /
Azərbaycanın müxalifət partiyalarının təmsil olunduğu "Qarabağ və Respublika Uğrunda Hərəkat"ın "Qarabağ Forumu"nda iştirak etməməsi barədə qərarı forumun təşkilatçısı olan Demokratiya Uğrunda İttifaqa (DUİ) üzv partiyanın kəskin tənqidinə səbəb olub.
"Qarabağ və Respublika Uğrunda Hərəkat"da təmsil olunan müxalifət partiyaları "Qarabağ Forumu"nda iştirak etmək üçün pul gözləyirlər. Onlar sahiblərindən Azərbaycanda Dağlıq Qarabağla bağlı vahid mövqe formalaşmasına imkan verməmək barədə tapşırıq alıblar", - çərşənbə axşamı Trend -a DUİ-də təmsil olunan Azadlıq Partiyasının sədri Əhməd Oruc bildirib.
Trend -un arayışı: DUİ Dağlıq Qarabağ münaqişəsinin nizamlanması ilə bağlı yaranan indiki situasiyanın müzakirəsi üçün mayın 14-də "Qarabağ Forumu" keçirmək niyyətindədir. DUİ-də Klassik Xalq Cəbhəsi, Milli-Demokrat, Azadlıq, Böyük Azərbaycan, Xalq partiyaları təmsil olunur.
"Qarabağ və Respublika Uğrunda Hərəkat"ın bugünkü iclasında DUİ-nin forumunda iştirak məsələsində konsensus əldə olunmayıb. "Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
Orucun sözlərinə görə, "Qarabağ və Respublika Uğrunda Hərəkat"ın qərarı "Qarabağ Forumu"nun keçirilməsinə heç bir təsir etməyəcək. "Hərəkatdakı partiyalar təşkil etdiyimiz tədbirlərin bir çoxunda iştirak etməyiblər. Onların hansısa tədbirdə iştirak etmələri həlledici əhəmiyyət kəsb etmir. Onların siyasi proseslərə təsir imkanları qalmayıb", - partiya sədri deyib.
Partiya sədri DUİ və "Qarabağ və Respublika Uğrunda Hərəkat" arasında fikir ayrılıqlarının olmaması ilə KXCP sədrinin səsləndirdiklərinin haradan qaynaqlandığını bilmədiyini deyib. "Hərəkatla Demokratiya Uğrunda İttifaq arasında fikir ayrllıqları var. İttifaq milli-demokratik platformada duran partiyaların qurumudur. Quruma üzv partiyalar milli məsələləri hər şeydən üstün tuturlar. Hərəkatda təmsil olunan partiyaların prinsipləri isə bəlli deyil", - Oruc bildirib.
Məqalə müəllifi ilə əlaqə ünvanı: [email protected]
