Azərbaycan, Bakı, 20 may / Trend , müxbir C.Babayeva /
Azərbaycan Sosial Demokrat Partiyası (ASDP) sol qüvvələrin ümumrespublika forumunun keçirilməsi ideyasını tənqid edib.
"Forumun təşkilat komitəsində təmsil olunan partiyalar çoxdan yaradılsa da, heç nəyə nail ola bilməyiblər. Onların forum keçirməsi ideyası "ölünün ölüyə gəl məni basdır" deməsinə bənzəyir", - çərşənbə günü Trend -a ASDP həmsədri Araz Əlizadə bildirib.
Trend -un arayışı: Azərbaycanın bir sıra solçu partiyaları bu ilin payızında sol qüvvələrin ümumrespublika forumunu keçirmək niyyətindədir. Forumun təşkilat komitəsinə Azərbaycanın Xalq Sosialist, Kommunist, Marksizm-Leninizm Kommunist və Demokratik Sol partiyaları daxildir.
ASDP həmsədri forum təşkilatçılarının onu tədbirə dəvət etdiklərini bildirib. "Forumda iştirak etmək istəmədiyimi bildirmişəm. Forum təşkilatçısının ASDP-nin real siyasi qüvvə olmadığına görə foruma dəvət olunmaması barədə səsləndirdiyi fikirləri məni az maraqlandırır", - Əlizadə deyib.
Trend -un arayışı: ASDP sol təmayüllü müxalifət partiyasıdır. Partiyanın həmsədrləri Araz Əlizadə və Azərbaycanın eks-prezidenti, hazırda mühacirətdə yaşayan Ayaz Mütəllibovdur. 1991 - ci ildə Azərbaycan müstəqilliyini elan etdikdən sonra, Ayaz Mütəllibov ilk prezident seçilib. Sonra onun barəsində cinayət işi açılıb və 1992 - ci ildən indiyədək Rusiyada mühacirətdə yaşayır.
Məqalə müəllifi ilə əlaqə ünvanı: [email protected]
