Azərbaycan, Bakı, 18 iyun / Trend , müxbir C.Babayeva /
Azərbaycan Ziyalıları Birliyi (AZB) müxalifət partiyalarının bələdiyyə seçkisi ilə bağlı təkliflərindən imtina edib.
"Aparıcı müxalif partiyalarından ziyalıların bələdiyyə seçkisinə qatılması ilə bağlı çox mürciətlər olunub. Onların təkliflərindən çox mədəni surətdə imtina etmişik. Ziyalılar müxalifətlə əməkdaşlıq etməməyə çalışır. Demokratik düşərgə ilə əməkdaşlığın tərəfdarıyıq. Azərbaycanda müxalifət təəssüf ki, demokratik düşərgəni təmsil etmir", - cümə axşamı Trend -a Azərbaycan Ziyalıları Birliyinin sədri Eldəniz Quliyev bildirib.
Trend -un arayışı: Azərbaycanda bələdiyyə seçkisinin bu ilin dekabrında keçirilməsi nəzərdə tututlur. Azərbaycanda bələdiyyələrin sayı 2757-dən 1766-ya enib.
Quliyev müxalifət partiyalarının ziyalılara münasibətindən narazılığını bildirib. "Müxalifət çoxdan dərk etməli idi ki, hər hansı siyasi qurumun önündə ziyalı dayanmırsa, onun yolunun əvvəli olmadığı kimi, sonu da olmayacaq", - AZB sədri deyib.
Onun fikrincə, ziyalılar bələdiyyə seçkisinə qatılmamalıdırlar. "Üzvlərimizə sərbəstlik verilsə də, onların əksəriyyəti seçkiyə qatılmamaq niyyətindədir. - AZB sədri deyib.
Trend - un arayışı: Azərbaycan Ziyalıları Hərəkatı 2003- cü ildə yaradılıb və 2007- ci ildə Ədliyyə Nazirliyində Azərbaycan Ziyalıları Birliyi kimi rəsmi qeydiyyatdan keçib. Təşkilatın məqsədi Azərbaycan ziyalılarının hüquqlarının müdafiəsi və müxalifətlə iqtidar arasında barışığa nail olmaqdır.
Məqalə müəllifi ilə əlaqə ünvanı: [email protected]