Azərbaycan, Bakı, 07 iyul / Trend , müxbir A.Hüseynbala /
Azərbaycan Parlamentinin komitə sədri ictimai yerlərdə və obyektlərdə siqaret çəkilməsinə qadağa qoyulması ilə bağlı qanunun səmərəli olacağına inanmır.
"Hazırda iki-üç layihə olsa da, onların müzakirəyə çıxarılmasına tələsmirik. Bu qanundakı müddəaların reallaşdırılması üçün cəmiyyətimiz hazır olmalıdır", - çərşənbə axşamı Trend -a Milli Məclisin Sosial siyasət komitəsinin sədri Hadi Rəcəbli bildirib.
Avropanın bəzi ölkələrində, o cümlədən qonşu Türkiyədə ictimai yerlərdə siqaret çəkilməsini qadağan edən qanun qəbul edilib.
Rəcəblinin sözlərinə görə, layihənin müzakirəyə çıxarılmamasının əsas səbəblərindən biri də onun icrası ilə bağlıdır.
"Tutaq ki, parlament qanunu qəbul etdi, onu necə icra edəcəklər. Əgər bu iş polisə tapşırılacaqsa, effekt verəcəyinə inanmaq çətindir", - komitə sədri əlavə edib.
Dünyanın bir çox ölkələrində bu cür qanunların icra mexanizminə gəldikdə, komitə sədri deyib ki, həmin dövlətlərdə hər bir müəssisə özü cərimə müəyyənləşdirib.
"Azərbaycanda bunu da tətbiq etmək olmur, bir daha qeyd edirəm ki, cəmiyyətimiz hazır olmadan qanunun qəbulu mümkün deyil", - Rəcəbli vurğulayıb.
Məqalə müəllifi ilə əlaqə ünvanı: [email protected]
