Azərbaycan, Bakı, 25 iyul / Trend , müxbir A.Hüseynbala/
Azərbaycanda qazanılmış immun çatışmazlığına (QİÇS-ə) qarşı mübarizə ilə bağlı yeni qanun qəbul oluna bilər.
"1996-cı ildə "QİÇS-ə yoluxmuş şəxslərin profilaktikası haqqında" qanun qəbul olunub. O vaxt Azərbaycanda cəmisi 7 nəfər bu virusa yoluxmuşdu", - şənbə günü Trend -a Milli Məclisin (Parlament) Sosial siyasət komitəsinin sədr müavini Musa Quliyev bildirib.
Quliyevin sözlərinə görə, dünyada əvvəllər QİÇS-ə qarşı mübarizənin profilaktikası, həmin insanların sosial müdafiəsi, hüquqi və ictimai məsuliyyət məsələləri o qədər geniş öyrənilməmişdi.
"Ötən 13 il ərzində dünyada həm hüquqi bazanın genişləndirilməsi, həm tibbi-sosial aspektlərlə bağlı çox mühüm dəyişikliklər olub. BMT-nin nəzdindəki Ümumdünya Səhiyyə Təşkilatının, MDB-nin bəzi ölkələrinin model qanunları qəbul olunub", - millət vəkili əlavə edib.
Komitə sədrinin müavini deyib ki, həm bunları, həm də Azərbaycanda son illərdə QİÇS-ə yoluxmanın çox sürətlə yayıldığını nəzərə alaraq qanunu yeniləşdirmək üçün əlavə və dəyişikliklərin edilməsi gündəmə gəlib. "Amma əlavə və dəyişikliklər qanunun bütün maddələrini əhatə etdiyindən yeni qanunun qəbulu daha sərfəlidir", - Quliyev vurğulayıb.
Millət vəkili deyib ki, indi komitənin gündəliyində bu qanuna əlavə və dəyişikliklər kimi məsələ durur.
"Komitənin tərkibində yaradılan işçi qrupa da əlavə və dəyişikliklərin hazırlanması tapşırılıb. İşçi qrup layihəni tamamlayıb və payız sessiyasi ərəfəsi komitədə müzakirə ediləndən sonra onun yeni qanun kimi Milli Məclisin müzakirəsinə çıxarılıb-çıxarılmaması dəqiqləşdiriləcək. Fikrimcə, yeni qanunun qəbul olunması daha sərfəlidir", - Quliyev bildirib.
Məqalə müəllifi ilə əlaqə ünvanı: [email protected]
