Azərbaycan, Bakı, 06 noyabr / Trend , muxbir A.Hüseynbala/
Azərbaycanın müxalifət partiyasının mindən artıq üzvü bələdiyyələrə namizədliyini irəli sürüb
"Biz seçkidə partiya kimi iştirak etdiyimizdən üzvlərimizin namizədliklərinin irəli sürülməsinə xüsusi əhəmiyyət veririk", - cümə günü Trend -a Bütöv Azərbaycan Xalq Cəbhəsi Partiyasının (BAXCP) sədr müavini Elçin Mirzəbəyli bildirib.
Trend -un arayışı: Azərbaycanda bələdiyyə seçkisi dekabrın 23-də keçiriləcək. 1718 bələdiyyəyə 15682 bələdiyyə üzvünün seçilməsi nəzərdə tutulur.
Azərbaycanda bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Mirzəbəylinin sözlərinə görə, əvvəlcə Mərkəzi Seçki Komissiyasına 960 partiya üzvünün bələdiyyə seçkilərinə qatılacağı ilə bağlı siyahı veriblər. "Amma sonradan partiyamızın onlarla üzvü namizəd olmaq istəyini bildirdiyindən indi bu rəqəm min nəfəri keçib", - sədr müavini əlavə edib.
Partiya funksioneri deyib ki, partiya təşviqat kampaniyası üçün xüsusi hazırlıq görüb. "Bu məqsədlə seçki platformamız hazırlanıb. Orijinal reklam roliklərindən də istifadə edəcəyik", - Mirzəbəyli vurğulayıb.
Sədr müavini təşviqat kampaniyası zamanı kütləvi aksiyaların keçirilməyəcəyini qeyd edib. "Bələdiyyə seçkiləri digər seçki kampaniyalarından fərqlənir. Bunu nəzərə alaraq ehtiyac yaranarsa namizədlərimizin seçicilərlə fərdi görüşlərinin keçirillməsini təşkil edəcəyik", - Mirzəbəyli xatırladıb.
Qüdrət Həsənquliyevin rəhbərliyi ilə Azərbaycan Xalq Cəbhəsi Partiyasının (AXCP) bir qrup üzvü 2002-ci ildə partiyadan ayrılaraq, özlərinin "birləşdirici" qurultayını keçiriblər və 2004-cü ilə qədər AXCP-nin "Birləşdirici" qanadı kimi tanınıblar. 2004-cü ildə qurumun adında dəyişiklik edilib və Bütöv Azərbaycan Xalq Cəbhəsi Partiyasının təsis qurultayı keçirilib. 2005-ci ildə dövlət qeydiyyatına alınan BAXCP özünü iqtidara qarşı konstruktiv müxalifətçi hesab edir. Həsənquliyev Milli Məclisin deputatıdır.
Məqalə müəllifi ilə əlaqə ünvanı: [email protected]
