Azərbaycan, Bakı, 28 yanvar / Trend , müxbir K.Zərbalıyeva/
Azərbaycan paytaxtında beynəlxalq axtarışda olan Türkiyə vətəndaşları tutulub.
Daxili İşlər Nazirliyinin mətbuat xidmətindən cümə axşamı Trend -a verilən məlumata görə, 6 ildir axtarışda olan Mehmet və Faysal Söyləməz qardaşlarının, qohumları Deniz Daşdemirin Nərimanov rayonu ərazisindəki mənzillərin birində kirayə yaşadıqları müəyyən olunub.
Yanvarın 26-da keçirilən əməliyyat-axtarış tədbirləri nəticəsində onlar yaxalanıblar. Onların üzərindən və yaşadıqları mənzillərdən 3 ədəd saxta pasport, Ermənistan, Suriya, İraq, ABŞ və Türkiyə dövlətlərinin milli valyutaları, siyasi ədəbiyyat, xarici mobil operatorlara məxsus simkartlar, çoxlu sayda sənəd və xəritə aşkar edilərək götürülüb.
Adıçəkilən şəxslər 2004-cü ildən cinayətkar birlik yaratmaq, adam oğurluğu cinayətlərində təqsirli bilinərək İstanbul Ağır Cəza Məhkəməsi tərəfindən barələrində həbsli axtarış elan edilib.
Faktla bağlı zəruri əməliyyat tədbirləri və araşdırmalar davam edir.