Bakı. Trend:
Yaponiyanın özəl şirkəti AstroX xərcləri əhəmiyyətli dərəcədə azaltmaq məqsədilə stratosferə qaldırılan hava şarından kosmik raketin buraxılması üzrə ilk təcrübəni həyata keçirməyi planlaşdırır.
Trend-in məlumatına görə, bu barədə "Kyodo" agentliyi xəbər verib.
Kyodo agentliyinin məlumatına görə, 2030-cu illərdə bu üsulla mikropeyklərin kommersiya məqsədilə orbitə çıxarılması nəzərdə tutulur.
Uzunluğu 5 metr olan raketin dekabr ayında diametri 100 metr olan hava şarından buraxılması planlaşdırılır. Şara start qurğusu və digər avadanlıqlar birləşdiriləcək. Şarın 20–25 km hündürlüyə qaldırılması, raketin isə ilk sınaq zamanı 100 km yüksəkliyə qalxması gözlənilir. Buraxılış Yaponiyanın Fukuşima prefekturası yaxınlığında okean üzərindən həyata keçiriləcək.
AstroX şirkəti bildirir ki, bu üsul xərcləri ciddi şəkildə azaldır, çünki xüsusilə yerüstü start meydançasının qurulması və texniki xidmətinə ehtiyac qalmır.
