Bakı. Trend:
Beynəlxalq Atom Enerjisi Agentliyinin (BAEA) İdarə Heyəti İranı yüksək dərəcədə zənginləşdirilmiş uran ehtiyatı da daxil olmaqla, agentliklə tam əməkdaşlığa çağıran qətnaməni təsdiqləyib.
Xarici media yazır ki, qətnamə layihəsi Fransa, Birləşmiş Krallıq, Almaniya və ABŞ tərəfindən təqdim edilib. İyirmi bir ölkə lehinə, on ölkə bitərəf qalıb. Üç ölkə - Rusiya, Çin və Niger - əleyhinə səs verib.
Sənəddə deyilir ki, İran BAEA-ya silah səviyyələrinə yaxın nüvə materialları ehtiyatlarının tam açıqlanmasını təmin etməli və agentlik müfəttişlərinin İranın nüvə obyektlərinə girişini təmin etməlidir. Orada qeyd olunur ki, bu, BAEA-nın nüvə materiallarının dinc məqsədlərlə istifadəsindən heç bir sapmanın olmadığını yoxlaya bilməsi üçün lazımdır.
Qərb diplomatlarından biri bildirib ki, qətnamənin məqsədi İrana öhdəliklərini yerinə yetirməsi üçün diplomatik təzyiqi davam etdirməkdir.
İranın Vyanadakı BMT-dəki Daimi Nümayəndəliyi qətnaməni tənqid edərək onu siyasi adlandırıb.
