Gürcüstan, Tbilisi, 18 mart / Trend , müxbir N.Kirsxaliya/
Gürcüstan Azərbaycanlıları Konqresinin Gənclər Forumu Gürcüstandakı gənc azərbaycanlıların birləşməsini və onların ölkə cəmiyyətinə inteqrasiyasını qarşısına məqsəd qoyur. Bunu Trend -a Gürcüstan Azərbaycanlıları Konqresinin sədri Əli Babayev deyib.
Dünən Tbilisidəki Kino evində Gürcüstan Azərbaycanlıları Konqresi Gənclər Forumunun "Gürcüstan bizim vətənimizdir" adlı təsis qurultayı keçirilib.
Babayev mövcud çoxsaylı problemlərin aradan qaldırılması baxımından gənclər strukturunun yaradılmasının vacibliyini qeyd edib.
Azərbaycanın Diaspor ilə İş üzrə Dövlət Komitəsinin şöbə müdiri Füzuli Nəcəfov qurultay iştirakçıları qarşısında çıxış edib. Onun sözlərinə görə, Gürcüstanda 40-dan çox qeyri-hökumət təşkilatı fəaliyyət göstərir. Azərbaycanlılarıdan ibarət bu təşkilatların yarısı gənclər təşkilatlarıdır.
Çıxış edən Gənclər Forumunun nümayəndələri problemlər barədə danışıblar.
Qurultayda Gürcüstanın Reinteqrasiya Nazirliyinin nümayəndələri, alimlər və ictimai xadimlər iştirak ediblər.