Azərbaycan, Bakı, 17 avqust /Trend, müxbir T.Hacıyev/
Azərbaycanın müxalif partiyalarının bu gün bir neçə seçki dairəsi üzrə razılıq əldə ediləcəyi gözlənilir. Bu barədə çərşənbə günü Trend-ə Azərbaycan Xalq Cəbhəsi Partiyası (AXCP) sədrinin siyasi məsələlər üzrə müavini Fuad Qəhrəmanlı məlumat verib.
"Müsavat başqanı İsa Qəmbər ilə AXCP sədri Əli Kərimlinin bu gün keçiriləcək görüşündə bir neçə seçki dairəsi üzrə ümumi namizəd məsələsində razılıq əldə olunacaq", - Qəhrəmanlı əlavə edib.
İyulun 15-də AXCP-nin yaranmasının 21 illiyinə həsr olunmuş tədbirdə "Müsavat" başqanı İsa Qəmbər AXCP ilə Müsavatın birləşərək bir partiya olmasını təklif edib. Hazırda partiyaların birgə seçki bloku yaratması istiqamətində danışıqlar gedir. Artıq 63 seçki dairəsi üzrə vahid namizədin irəli sürülməsi ilə bağlı razılıq əldə edilib. Seçki prosesi başlayana qədər razılaşdırılmış dairələrin sayının 80-ə çatacağı gözlənilir.
Azərbaycanda Parlament seçkilərinin 2010-cu ilin noyabr 7-də keçiriləcəyi gözlənilir. Bundanəvvəlki seçkilər 2005-ci ilin noyabrında keçirilib. Azərbaycanda Parlament seçkiləri majoritar sistem üzrə 125 seçki dairəsində aparılır.
AXCP-nin sədr müavini partiyanın rəyasət heyətinin bazar ertəsi keçirilən toplantısında müzakirə olunan məsələlər haqqında da danışıb.
"Toplantıda, ilk olaraq, "Müsavat" və AXCP arasında danışıqların gedişi müzakirə olunub. Danışıqların tez bir zaman ərzində yekunlaşması tövsiyə olundu. Partiyanın seçki blokunun yaradılması, kompromis mövqeyin davam etdirilməsi qərara alındı", - Qəhrəmanlı bildirib.
Onun sözlərinə görə, partiyanın qurultayının keçirilməsi də təxirə salınıb.
"Bu həftə ərzində nəzərdə tutulmuş qurultayın, zal olarsa belə, artıq keçirilməsinin mümkün olmadığı məsələsinə toxunulub. Zalın hələ də müəyyənləşməməsi hazırlıq işlərini yekunlaşdırmağa imkan vermir. Qərar verilib ki, qurultayın vaxtı qeyri-müəyyən müddətə təxirə salınsın. Rəyasət heyətinin növbəti toplantılarında bu barədə qərar qəbul olunacaq", - Qəhrəmanlı deyib.
Azərbaycan Xalq Cəbhəsi Azərbaycanda Milli-Azadlıq Hərəkatı zamanı gizli şəkildə 1989-cu ildə təsis olunub. Partiya kimi 1995-ci ildə qeydiyyatdan keçib. 2000-ci ilin avqust ayında partiya sədri Əbülfəz Elçibəyin vəfatından sonra, ideoloji səbəblərdən partiya iki hissəyə - Azərbaycan Xalq Cəbhəsi Partiyası (AXCP) və Klassik Xalq Cəbhəsi Partiyası (KXCP) qollarına bölünüb.
