Azərbaycan, Bakı, 24 avqust /Trend, müxbir S.Süleymanov/
Almatıda Qazaxıstan Hərbi Məhkəməsinin sədrinə sui-qəsd edilib. Bu barədə Qazaxıstan Daxili İşlər Nazirliyinin mətbuat xidməti məlumat verib.
"Avqustun 23-də saat 09:00-da Almatıda Jarkov və Levitan küçələrinin kəsişməsində şütüyən "Mirsubishi Pajero" markalı avtomaşından Qazaxıstan Hərbi Məhkəməsinin sədri Serik Baybatırova silahdan atəş açılıb", - nazirliyin yaydığı press-relizdə deyilir.
Məlumatda bildirildiyinə görə, avtomobilin izlənməsi nəticəsində, cinayətkar həyətlərin birində avtomaşını ataraq gizlənib.
"Hazırda atəş açan şəxs müəyyənləşdirilib. Bu, Baybatırovun keçmiş kürəkəni, Şimali Qazaxıstan vilayətinin 39 yaşlı sakinidir", - məlumatda qeyd olunur.
Mətbuat xidmətinin məlumatına görə, şübhəli şəxsin yerinin müəyyənləşdirilməsi və saxlanılması məqsədilə əməliyyat-axtarış tədbirləri aparılır. Ölüməqəsd faktı üzrə cinayət işi qaldırılıb.