Azərbaycan, Bakı, 20 sentyabr /Trend, müxbir Ü.Sadıxova/
İqtisadi, elmi və mədəni əməkdaşlıq üzrə Azərbaycan-Misir hökumətlərarası komissiyasının dördüncü iclası 2011-ci ilin martında Qahirədə keçiriləcək. Orada ölkələr arasında ticari və investisiya münasibətlərinin inkişafı müzakirə olunacaq. Bu barədə Misirin beynəlxalq əməkdaşlıq üzrə naziri xanım Faizə Əbu Nəca deyib.
"İclas zamanı komissiya əməkdaşlıq sahəsində görülən işlərin nəticələri və son görüşlərdə imzalanan sazişlərin həyata keçirilməsi ilə tanış olacaq", - Trend-ə Əbu Nəca deyib.
Onun sözlərinə görə, dördüncü iclas zamanı Azərbaycan və Misir diqqətlərini konkret üstünlüklər verən əməkdaşlığın inkişafına yönəldəcəklər.
"Səhiyyə, dərman və vaksinlər istehsalı, mülki aviasiya, tikinti, neft-qaz, telekommunikasiya və informasiya texnologiyaları sahələri əməkdaşlığın diqqət mərkəzində olacaq", - nazir bildirib.
Komissiyanın son iclası 2007-ci ildə Bakıda, birinci iclas isə 2005-ci ildə Qahirədə baş tutub.
Əbu Nəcanın sözlərinə görə, gündəliyə turizm, kənd təsərrüfatı, ali təhsil və elmi tədqiqatlara birgə investisiyalar məsələləri də daxil ediləcək.
İqtisadi əlaqələrin genişləndirilməsi üçün ölkələr arasında viza rejiminin sadələşdirilməsinə toxunan Əbu Nəca qeyd edib ki, Misir iş adamlarının Azərbaycana viza almaları üçün əlverişli şərait var və belə olan halda şirkətlərdən xüsusi dəvət tələb olunmur.