Azərbaycan, Bakı, 20 yanvar / Trend, müxbir A.Tağıyeva /
İraq ümid edir ki, bir qədər gərginlik yaşamış Türkiyə-İraq münasibətləri əvvəlki səviyyəyə qayıdacaq. Bunu İraq parlamentinin Beynəlxalq münasibətlər komitəsinin sədri Hammam Hammudi Trend-ə eksklüziv müsahibəsində deyib.
Onun sözlərinə görə, Türkiyə İraqda bütün sahələrdə inkişaf etmiş əlaqələrə malikdir ki, bu da bu ölkənin yürütdüyü müdrik siyasətin nəticəsidir. Lakin Baş nazir Ərdoğanın öz çıxışlarının birində İraqın daxili siyasətini tənqid etməsi İraqın bəzi dairələrində etirazlar doğuraraq onun daxili işlərinə müdaxilə kimi qiymətləndirilib.
"İraqın rəsmi şəxslərinin Türkiyənin onun daxili işlərinə qarışmasına dair bəyanatlarına Ərdoğanın İraqın daxili siyasətini tənqid etməsinə qarşı etiraz səbəb olub", - Hammudi deyib.
O həmçinin qeyd edib ki, Türkiyənin digər rəsmi şəxslərinin başqa bəyanatları bu məsələyə aydınlıq gətirib. Qeyd olunub ki, həmin ifadələr İraqın işlərinə müdaxilə edilməsi deyil, İraqa və onun vətəndaşlarına olan xüsusi münasibətdən irəli gəlir.
Parlament komitəsi sədrinin sözlərinə görə, İraq və Türkiyə terrorla mübarizə sahəsində də əməkdaşlığa dair sazişə malikdirlər.
"Terrorizmlə mübarizə üzrə Türkiyə-İraq-ABŞ birgə qrupu möcvuddur və bu istiqamətdə ciddi addımlar atılıb", - o bildirib.
Hammudi qeyd edib ki, indiki məqamda bu qrup qarşısında silahlı yaraqlıların fəaliyyətləri ilə bağlı bəzi problemlər ortaya çıxıb. Başqa problem ondan ibarətdir ki, İraq ordusu və İraqın şimalınadakı kürd administrasiyasının ordusu hazırda yaraqlılarla tam dəyərli mübarizə aparmağa qadir deyillər.
"Ona görə də bu missiyanı öz üzərinə Türkiyə ordusu götürüb. Lakin tərəflər teerrorun aradan qaldırılması üçün öz səylərini davam etdirmək fikrindədirlər", - Hammudi deyib.
Hammudi onu da bildirib ki, İraqın etnik tərkibinin müxtəlifliyi türk ölkələri ilə əlaqələrin inkişafında mühüm amildir.
İraqda kürdlər, türkmənlər, assuriyalılar, ərəblər, dini etiqad üzrə isə şiələr, sünnilər və xristianlar yaşayır. Ona görə İraq regionun bütün ölkələri ilə inkişaf etmiş əlaqələrə malikdir.
"İraq hakimiyyəti, ölkə parlamenti və bütün siyasi partiyalar türk ölkələri, o cümlədən Türkiyə ilə inkişaf etmiş əlaqələrə malikdirlər" - o deyib.
Bu zaman Parlament komitəsinin sədri məhz Türkiyə ilə münasibətlərə xüsusi diqqət ayırıb. O deyib ki, İraqda çoxlu türk şirkətləri var.
"Təkcə Şimali İraqın kürd administrasiyasında 400-dən artıq türk şirkəti var. Hər il türk mallarının idxalı 5-15 milyard dollar təşkil edir ki, bu da iki ölkənin iqtisadi əlaqələrinin inkişaf etməsinin göstəricisidir", - Hammudi qeyd edib.
İraq türkmənləri Səddam Hüseyn rejiminin devrilməsinə kömək edən əsas qüvvələr arasında əsas yeri tutub. Onlar ölkə parlamentində də təmsil olunurlar. Onların arasında çoxlu diplomatlar var. İraqlı parlamentari hesab edir ki, ona görə də İraqın türk dövlətləri ilə münasibətləri inkişaf edib və çox şeylər vəd edir.