Azərbaycan, Bakı, 6 mart / Trend müxbir T.Cəfərov /
Xəzəryanı dövlətlərin işçi qrupunun növbəti görüşünün martın 20-nə kimi Türkmənistanın paytaxtı Aşqabadda keçirilməsi gözlənilir. Bunu İran Prezidentinin Xəzər üzrə xüsusi nümayəndəsi Məhəmməd Mehdi Axundzadə deyib. Trend-in məlumatına görə, bu barədə MEHR xəbər agentliyi məlumat verir.
O deyib ki, görüşdə əsasən Xəzər dənizinin hüquqi statusuna aid olan konvensiya layihəsində açıq qalan məsələlərin müzakirəsinin davam etdirilməsi və dövlət başçılarının görüşünün proqramının hazırlanması işləri aparılacaq.
Xəzəryanı dövlətlər 2003-cü ilin noyabrında Xəzərdə dəniz mühitinin qorunması üzrə Çərçivə Konvensiyasını imzalayıblar.
1998-ci ilin iyulunda Qazaxıstanla Rusiya arasında yeraltı sərvətlər üzrə suveren hüquqların həyata keçirilməsi məqsədi ilə Xəzərin şimal hissəsində dəniz dibinin bölünməsi haqqında saziş imzalanıb, 2002-ci ilin mayında isə həmin sazişə müvafiq protokol imzalanıb.
2001-ci il noyabrın 29-da və 2003-cü il fevralın 27-də Qazaxıstanla Azərbaycan arasında Xəzər dənizinin dibinin bölünməsi haqqında saziş və ona müvafiq protokol imzalanıb.
Həmçinin, 2003-cü il mayın 14-də Qazaxıstan, Azərbaycan və Rusiya arasında Xəzər dənizinin həmsərhəd hissələrinin bölünməsi xəttinin qovuşma nöqtəsinə dair saziş imzalanıb.