Azərbaycan, Bakı, 19 noyabr / Trend müxbir M.Əliyev/
Azərbaycan özünü Avropaya etibarlı tərəfdaş kimi göstərir. Bu barədə Trend-ə bazar ertəsi Milli Məclisin deputatı, Avronest PA-nın Enerji təhlükəsizliyi komitəsinin həmsədri Fuad Muradov bildirib.
"Hazırda Azərbaycan qazının Avropaya daşınması üçün böyük hazırlıq gedir və Azərbaycan çalışır öz enerji resurslarını Avropaya yerləşdirsin", - Muradov deyib.
Onun sözlərinə görə, bu günlərdə Brüsseldə Azərbaycan Respublikası Dövlət Neft Şirkətinin nümayəndəliyinin açılışı da bir daha göstərdi ki, Azərbaycan Avropanın enerji təhlükəsizliyi məsələsində yaxından iştirak edir.
"Bizim əlaqələrimiz inkişaf edir. İqtisadiyyat üzrə çox vacib əməkdaşlıq bundan sonra da olacaq. Eyni zamanda, Azərbaycan enerjisinin Avropaya daşınmasında da böyük işlər görüləcək və bu, çox müsbət haldır. Yaxın zamanlarda TANAP layihəsi həyata keçiriləcək. Təbii ki, bu layihə də Avropa üçün çox müsbət olacaq. Çünki bu saziş imkan verəcək ki, Avropa bir neçə mənbədən enerjini alsın", - Muradov deyib.
Komitə həmsədri eyni zamanda qeyd edib ki, Azərbaycan Avropa ölkələri ilə tək enerji sahəsində yox, həm mədəniyyət, iqtisadiyyat sahələri üzrə də əlaqələr qurmağa çalışır.
