Azərbaycan, Bakı, 9 avqust /Trend, müxbir Elçin Mehdiyev/
Sabah Rusiya Prezidenti Vladimir Putinin iştirakı ilə Azərbaycan və Ermənistan prezidentləri İlham Əliyev və Serrj Sarkisyanın görüşü olacaq. Trend-in məlumatına görə, bu barədə Azərbaycan Prezidenti Administrasiyası rəhbərinin müavini, PA-nın Xarici əlaqələr şöbəsinin müdiri Novruz Məmmədov öz "Twitter" səhifəsində bildirib.
PA rəsmisinin sözlərinə görə, görüşdə Azərbaycan və Ermənistan prezidentləri arasında Ermənistan-Azərbaycan Dağlıq Qarabağ münaqişəsinin həlli istiqamətində danışıqlar gedəcək.
N.Məmmədov qeyd edib ki, danışıqlarda irəliləyiş Ermənistan Prezidentinin konstruktiv mövqe tutmasından asılı olacaq.
PA rəsmisi bildirib ki, bu gün isə Azərbaycan və Rusiya prezidentləri əməkdaşlıq əlaqələrini genişləndirmək üçün ikitərəfli formatda görüş keçirəcəklər.