Səyavuş Heydərov: Xocalı faciəsini törətmiş Ermənistanla hər hansı müsəlman ölkəsinin dostluq etməsi islama ziddir

Bakı. Elçin Mehdiyev – Trend:

Azərbaycanın milli maraqları bəzi qərb dairələrini qane etmir və nəticədə təzyiq göstərməyə çalışırlar.

Trend-in məlumatına görə, bunu Dini Qurumlarla İş üzrə Dövlət Komitəsinin sədr müavini Səyavuş Heydərov deyib.

S.Heydərov bildirib ki, bu gün bəzi qərb dövlətlərinin islamofobiya siyasəti məqsədyönlüdür: “Azərbaycanın islamafobiyaya qarşı fəaliyyəti isə onları qıcıqlandırır və Azrbaycana qarşı bəzi qərb dövlətlərindən yönləndirilən böhtan və qərəz mahiyyətli təzyiqlərin başlıca səbəblərindən birini də bununla əlaqələndirmək olar. Ona görə də onlar zəif və idarəolunan Azərbaycan istəyirlər”.

Sədr müavini həmçinin bildirib ki, dünyanın güc mərkəzlərinin Azərbaycanın yerləşdiyi region ətrafında maraqları toqquşduğu üçün əvvəllər Azərbaycana qarşı təzyiqlər siyasi müstəvidə idisə, indi dini müstəvidə də təzyiqlər mövcuddur:

“Təəssüflər olsun ki, buna dəstək edənlər arasında müsəlman ölkəsi də var. Necə ola bilər ki, Xocalı faciəsini törətmiş Ermənistanla müsəlman ölkəsi dostluq etsin? Bu, İslam dininə ziddir”.

S.Heydərov vurğulayıb ki, bu gün həm müsəlman, həm qərb dünyası üçün ən böyük töhfəni Azərbaycan verir, ikinci belə bir dövlət yoxdur: "Belə ki, Azərbaycan dinlərarası, mədəniyyətlərarası, sivilizasiyalararası dialoqun və əməkdaşlığın güclənməsinə əməli səylər göstərir və Azərbaycanın bu siyasəti dünya birliyi tərəfindən yüksək dəyərləndirilir. Azərbaycan coğrafi baxımdan kiçik ölkə olsa da, dünyada sülhün bərqərar olunması naminə həyata keçirdiyi missiya böyük əhəmiyyət kəsb edir”.

Trend-in ən mühüm və maraqlı xəbərlərini "Telegram"da izləyin