Bakı. Trend:
Aİ Azərbaycan və Ermənistan arasında sülh prosesini dəstəkləməyə davam edəcək.
Trend-in verdiyi məlumata görə, bunu Aİ-nin Azərbaycandakı səfiri Mariyana Kuyundziç Bakıda Avropa Gününə həsr olunmuş tədbirdə bildirib.
"Avropanı müdafiə etmək həm də sərhədlərimizdən kənarda sülhü, sabitliyi və beynəlxalq hüququ dəstəkləmək deməkdir. Məhz buna görə də Aİ Cənubi Qafqazın sabitliyini və rifahını təhlükəsizliyimiz üçün vacib hesab edir. Hər iki tərəfin gələcəyi bir-biri ilə bağlıdır. Biz Azərbaycan və Ermənistan arasındakı sülh prosesini, o cümlədən Aİ-nin artıq ən böyük donor olduğu nəqliyyat infrastrukturunun inkişafı və minaların təmizlənməsi təşəbbüsləri vasitəsilə dəstəkləməyə davam edəcəyik", - deyə o bildirib.
Kuyundziç qeyd edib ki, İrandan Azərbaycana edilən son pilotsuz təyyarə hücumlarından sonra Aİ Azərbaycana qeyd-şərtsiz dəstəyini bildirib. Bundan qısa müddət sonra Avropa Şurasının prezidenti António Kosta Bakıya səfər edərək Azərbaycan və onun xalqı ilə tam həmrəyliyini ifadə edib.
"Xarici İşlər və Təhlükəsizlik Siyasəti üzrə Ali Nümayəndə və Avropa Komissiyasının vitse-prezidenti Kaya Kallas da hadisədən dərhal sonra Azərbaycan xarici işlər naziri Ceyhun Bayramovla telefon danışığı zamanı Azərbaycanla həmrəyliyini ifadə etdi", - deyə o bildirib.
