"Dövlət əmin-amanlıq, müxalifət isə dövlətin qanunlarına zidd gedərək qarşıdurma yaratmaq istəyir". Bu barədə Trend ə millət vəkili Zəlimxan Yaqub "Azadlıq" blokunun oktyabrın 8-də paytaxtın mərəkəzində icazəsiz mitinq keçirmək cəhdinə münasibət bildirərkən deyib.
Z.Yaqub onu da qeyd edib ki, müxalifət demokratiya və qanundan ağızdolusu danışsa da, özü buna əməl etmir: "Dövlət ona yol göstərir, müxalifət isə öz bildiyi yolla getmək istəyir. Demokratiya dövlət tərəfindən qoyulan qanunlardır. Müxalifət isə bu qanuna tabe olmaq istəməməklə böyük səhvə yol verir. Həmişə "Qələbə" meydanında mitinq keçirən müxalifətin birdən-birə paytaxtın mərkəzinə iddailı olmasında nə marağı var".
Polislərin mitinq iştirakçılarına təzyiqlərini isə millət vəkili belə izah edib: "Polisin burada zərrə qədər günahı yoxdur. Günah qarşıdurma yaratmaq istəyən qüvvələrdədir. Polisin üstünə sel gəlirsə, o, qaya kimi döşünü verməməlidir. Polis dövlətin qanunlarına tabedir".