Asiyada Qarşılıqlı Fəaliyyət və Etimad Tədbirləri Müşavirəsinin (AQFETM) üzvü olan dövlətlərin başçılarının mayın sonlarında Astanada keçiriləcək qarşıdakı sammitinin gündəliyi təşkilatın ekspertləri tərəfindən hazırlanır. Bu barədə Trend məlumat verib.
İclas təşkilatın dövlət başçılarının iyunun 17-də keçiriləcək sammiti ərəfəsində keçiriləcək. Növbəti sammitin gedişində hərbi-siyasi, iqtisadi, mədəni və ekologiya sahəsində kompleks məsələlərin nəzərdən keçirilməsi, eləcə də, regionda təhlükəsizlik və etimadın möhkəmlənməsi üzrə məsələlər nəzərdən keçiriləcək. İlkin olaraq bütün bu məsələlər sənədləri və sammitin gündəliyini hazırlayacaq ekspertlərin görüşü zamanı nəzərdən keçiriləcək.
Dövlət başçıları həm də təşkilatın xarici işlər nazirlərinin görüşündə qəbul edilən Etimad tədbirləri Kataloqunun reallaşdırılması mexanizmləri və Katiblik barədə Əsasnaməni təsdiq etməlidirlər.
Xatırladaq ki, AQFETM 1992-ci ildə Qazaxıstan prezidenti N.Nazarbayevin təşəbbüsü ilə yaradılıb. AQFETM-nin dövlət və hökumət başçılarının ilk sammiti 2002-ci ilin iyununda keçirilib. Təşkilata 16 dövlət - Əfqanıstan, Azərbaycan, Misir, Hindistan, İsrail, İran, Qazaxıstan, Çin, Qırğızıstan, Monqolustan, Pakistan, Fələstin, Rusiya, Tacikistan, Türkiyə, Özbəkistan daxildir. İndoneziya, Malaziya, ABŞ, Cənubi Koreya, Yaponiya, Ukrayna, Vyetnam təşkilatda müşahidəçi statusuna malikdir. AQFETM -da BMT, ATƏT, Ərəb Dövlətləri Liqası kimi bir sıra beynəlxalq təşkilatlar da təmsil olunur.