Bu gün, mayın 24-də Azərbaycanın mədəniyyət günləri çərçivəsində Azərbaycan Demokratik Respublikasının müstəqilliyinin 88-ci ildönümünə həsr olunmuş təntənəli konsert keçirilib. Bu barədə Trend ə Azərbaycanın Macarıstandakı səfirliyindən məlumat verilib.
Tədbir Budapeştin ən gözəl konsert zalında- "Belvaro Jdinxas"da keçirilib. Dəvət olunanlara arasında çoxlu sayda Macarıstanın rəhbər şəxsləri və ictimai xadimləri var.
Bununla yanaşı, səfirlikdən bildirilib ki, mayın 23-də macar paytaxtında məşhur muğam ustaları- Azərbaycanın xalq artisti Ağaxan Abdullayevin və Nəzakət Teymurovanın konserti keçirilib. Onları tarda Firuz Əliyev və kamançada İsmayıl Həmidov müşaiyət edib. Azərbaycanın xalq rəqsi "Tərəkəmə" ifa olunub.
Konsertdə Azərbaycanın Macarıstandakı səfiri Həsən Həsənov, Xaricdə yaşayan azərbaycanlılarla iş üzrə Dövlət Komitəsinin şöbə müdiri Dəyanət Abdullayev, diplomatlar və Azərbaycanın Budapeştdəki səfirliyinin üzvləri iştirak edib.
