Rusiyaya məxsus texnika və hərbi əmlakın Axalkalaki bazasından Rusiyanın Ermənistanın Gümrüdəki bazasına aparılan kiçik hissəsi regionda hərbi-siyasi vəziyyətin sabitsizləşməsinə gətirib çıxara bilməz. Trend in xəbər verdiyi kimi, bu barədə mayın 31-də Bakıda keçirilmiş mətbuat konfransında RF baş nazirinin müavini, müdafiə naziri Sergey İvanov MDB ölkələri müdafiə nazirlərinin Azərbaycanda keçirilmiş iclasının yekunlarını şərh edərkən bəyan edib.
"Texnikadan çox hərbi əmlak çıxarılır",- deyə nazir qeyd edib. O vurğulayıb ki, bu, Rusiyanın ASQMM (Avropada silahlı qüvvələrin məhdudlaşdırılması haqqında müqavilə) üzrə götürdüyü cinah öhdəliklərini pozmur.
Nazir qeyd edib ki, texnikanın, o cümlədən ağır texnikanın əsas hissəsi Axalkalaki bazasından Azərbaycan vasitəsilə RF ərazisinə daşınır.
"Batumi bazasına gəlincə, onun ləğvi bir qədər gec həyata keçiriləcək və texnika, əsasən, dənizlə daşınacaq", - deyə S.İvanov sonda bildirib.