Deputat korpusunun fəaliyyətinin yaxşılaşdırılması üçün onun köməkçilərə və xidməti maşına ehtiyac var. Bu barədə Trend ə Milli Məclisin təhlükəsizlik və müdafiə məsələləri daimi komissiyası sədrinin müavini Aydın Mirzəzadə bildirib.
Millət vəkili bildirib ki, əslində deputatın iki köməkçisi olmalıdır: "Biri bizim seçildiyimiz dairədə olmalıdır. Seçicilərlə əlaqəmizin sıx qurulmasına, deputat qəbil otağının şəffaf fəaliyyətinə, bir sıra yerlərdə mümkün olan problemlərin həllinə həmin köməkçimiz vasitəsilə təsir edə bilərik. İkinci köməkçimizin iş yeri isə parlament binasında olmalıdır. Bu köməkçi qanunlara dair bizim təkliflərimizin hüquqi mexanizminin axtarıb tapılmasında, sənədləşmə prosesində iştirakda, hakimiyyət orqanları ilə əlaqələrin yaradılmasında bizə yardımçı olmalıdır".
A.Mirzəzadə deputatların xidməti maşınlarla təmin olunması məsələsinə də toxunub. Bildirib ki, bu təkid deyil, deputatların fəaliyyəti üçün zəruri olan məsələlərdən biridir: "Bu gün ictimai nəqliyyatdan istifadə edən deputatlarımız çoxdur. Bu o qədər də problem yaratmır. Amma bununla belə gün ərzində bir neçə tədbirdə iştirak edilməsi və digər məsələlərin həlli deputatın maşınla təminatını zəruriyətə çevirir".
Millət vəkili bu məsələlərin də həll olunacağına ümid etdiyini bildirib: "Bu gün parlamentin binası əla təmir edilib. Deputat kabinetləri Avropa parlamentlərinin deputat kabinetləri səviyyəsindədir. Eyni zamanda deputatların rabitə ilə təmin edilməsi və bizim yaxşı fəaliyyət göstərməyimiz üçün yaradılan belə şərait onu deməyə əsas verir ki, maşın və köməkçilərlə bağlı məsələ də həll edilə bilər".
