Xanlar rayonunun Dozlar kəndində baş verən sürüşmənin səbəbi artıq məlumdur. Bu günə kimi kənddə 4 ev tamamilə dağılıb, 42 evin sakinləri isə təhlükəsiz yerlərə köçürülüb.
Bu barədə məlumatı Trend ə rayon İcra Hakimiyyəti aparatının şöbə müdiri Asif Hacıyev verib. Onun sözlərinə görə, Ekologiya və Təbii Sərvətlər Nazirliyinin əməkdaşları artıq sürüşmənin səbəblərini müəyyənləşdiriblər.
Nazirliyin Milli Geologiya-kəşfiyyat xidmətindən bildiriblər ki, sürüşməyə səbəb Dozlar kəndinin şimal-qərb hissəsindən keçən, əsası Kürək çayından götürülən, kəndin suvarılması üçün 1989-cu ildə çəkilən 630 mm-lik boru xətti səbəb olub. Belə ki, kəndin şimal nahiyəsində sözügedən boru xəttinin üç müxtəlif yerində su sıçrayışları aşkar olunub. Müəyyən edilib ki, bu çıxışlardan kənd əhalisi 20 ilə yaxın müddət ərzində torpaq sahələrinin suvarılması üçün istifadə edib. Bu cür suvarma mailliyi yüksək olan kənd ərazisində torpaq qatlarında fiziki proseslər nəticəsində sürüşmə hadisələrinə gətirib çıxarıb.
