Azərbaycan Milli İstiqlal Partiyasının (AMİP) qərargahla təmin olunması ilə bağlı prezident İlham Əliyevə ünvanladığı müraciətə Prezident Aparatında baxılıb və Dövlət Əmlakının İdarə Edilməsi üzrə Dövlət Komitəsinə göndərilib. Bu barədə Trend ə AMİP-in sədri Ayaz Rüstəmov məlumat verib.
O bildirib ki, dövlət başçısına ünvanladığı müraciət Prezident Aparatı ictimai-siyasi şöbənin müdiri Əli Həsənova göndərilib. Əli Həsənov da müraciətlə tanış olaraq baxılması üçün Əmlak Komitəsinə göndərib. Ayaz Rüstəmovun sözlərinə görə, Əmlak Komitəsindən hələlik heç bir cavab yoxdur.
"Əmlak Komitəsi tərəfindən bizə konkret cavab veriləndən sonra buna uyğun müvafiq addımlar atacağıq. Hələlik isə dözüm nümayiş etdiririk, düşünürük ki, bəlkə bizə qərargah üçün yer təklif olundu. Buna görə də hələlik etiraz aksiyaları keçirməyi planlaşdırmırıq"-deyə AMİP sədri bildirib.
