Demokratik İslahatlar Partiyasının (DİP) sədri, millət vəkili Asim Mollazadə ATƏT-in Parlament Assambleyasının vitse-prezidenti, Ukrayna Radasının Xarici İşlər Komitəsi sədrinin müavini Oleq Bilorusla görüşüb. Bu barədə Trend ə DİP-dən məlumat verilib.
Görüşdə regional problemlər, Ermənistan-Azərbaycan münaqişəsi, "Demokratiya və İqtisadi İnkişaf Uğrunda GUAM Təşkilatı"nda əməkdaşlıq, Azərbaycan-Ukrayna münasibətləri müzakirə olunub.
Asim Mollazadə bildirib ki, ATƏT öz prinsiplərinə, xüsusilə də Avropa ölkələrinin ərazi bütövlüyü, II Dünya müharibəsindən sonra Avropada təhlükəsizlik prinsipinə zidd olaraq Ermənistan-Azərbaycan münaqişəsinin həllində passivlik nümayiş etdirir.
Partiya sədri Dağlıq Qarabağ münaqişəsinin, həmçinin digər regional münaqişələrin həlli istiqamətində "Demokratiya və İqtisadi İnkişaf Uğrunda GUAM Təşkilatı"na üzv olan ölkələrin, o cümlədən Azərbaycanla Ukraynanın eyni mövqedən çıxış etməsinin vacibliyini vurğulayıb.
Oleq Bilorus da öz növbəsində hansısa ölkənin bir hissəsində müstəqilliklə bağlı referendumun keçirilməsinin beynəlxalq qanunvericiliyin prinsiplərinə zidd olduğunu vurğulayıb.