Oktyabrın 31-də Azərbaycanda prokuroruluq orqanında 80 ştat vahidi üzrə elan edilmiş sənəd qəbulu başa çatıb. Bu barədə Trend ə Respublika Baş Prokurorluğunun Kadrlar İdarəsindən məlumat verilib.
3 iyul 2006-cı il tarixdən başlanan sənəd qəbulu dövründə prokurorluğa işə qəbul olunmaq üçün 500 nəfərə yaxın ali hüquq təhsilli vətəndaş sənəd təqdim edib.
Qeyd edək ki, əvvəlcə sənəd qəbulu sentyabr ayına qədər nəzərdə tutulsa da, sonradan prokurorluq orqanlarına işə qəbulun səmərəliliyinin təmin edilməsi, hüquqşünas ixtisası üzrə ali təhsil almış və oktyabr ayında Silahlı Qüvvələrdən tərxis olunmuş şəxslərin müsabiqədə iştirak etməsinə daha geniş şərait yaradılması məqsədilə sənədlərin qəbulu oktyabrın 31-dək uzadılmışdı.
Sənəd qəbulu Azərbaycan Prezidentinin 2001-ci il 19 iyun tarixli Fərmanı ilə təsdiq edilmiş "Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında" Əsasnaməyə uyğun olaraq keçirilib.
Yaxın vaxtlarda imtahanlar keçiriləcək.