"Lalə Şövkətin müxalifətin fəaliyyətinin dayandırlması barədə təklifinin "Azadlıq" bloku tərəfindən qəbul edilməməsi onu narazı salmadı. Çünki Lalə xanım özü də bu qənaətə gəldi ki, bu təklif müxalifət qüvvələrinin hamısı tərəfindən qəbul olunacağı, əməl ediləcəyi təqdirdə effektli ola bilər". Bu fikirləri Trend ə açıqlamasında "Azadlıq" siyasi blokunun həmtəsisçisi, Vətəndaş və İnkişaf Partiyasının sədri Əli Əliyev bildirib.
Qeyd edək ki, "Azadlıq" blokunun həmtəsisçisi Lalə Şövkət bütün müxalifətin müəyyən müddətə fəaliyyətini dayandırması, etiraz əlaməti olaraq cəmiyyətdə ümumi durğunluq mühiti yaradılması təklifini irəli sürmüşdü. Əli Əliyevin sözlərinə görə, "Azalıq" blokunun Sədrlər Şurasında bu məsələ müzakirəyə çıxarlanda müxalifət qüvvələrinin mövqeləri, təklifin perspektivi və digər məsələlər nəzərə alınaraq, təklifin əksinə, müxalifətin fəaliyyətinin daha da gücləndirilməsi qərara alınıb.
Ə.Əliyevin sözlərinə görə, söz və mətbuat azadlığının müdafiəsi üzrə Koordinasiya Şurasının da fəaliyyəti davam etdiriləcək və medianın problemləri həllini tapanadək bu istiqamətdə işlər görüləcək: "Koordinasiya Şurasının buraxılacağını zənn etmirəm. Əksinə, növbəti iclasda Koordinasiya Şurasının fəaliyyətini hansı formada davam etdirməsi məsələsi müzakirə olunacaq".
Qeyd edək ki, "Azadlıq" blokunda 4 müxalifət partiyası- Azərbaycan Xalq Cəbhəsi (AXCP), Liberal, Vətəndaş və İnkişaf (VİP), Azərbaycan Demokrat (ADP) partiyaları təmsil olunur.
